ئەپڵ وەشانەکانی iOS 13.4 و iPadOS 13.4 ـی بە پشتگیری لە Trackpad ـی ئایپادەکان و زیاترەوە بەردەستکرد

هەر وەک چاوەڕوان دەکرا، ئەم ئێوارەیە کۆمپانیای ئەپڵ وەشانەکانی iOS 13.4 و iPadOS 13.4 ـی بە پشتگیری لە Trackpad ـی ئایپادەکان و زیاترەوە بەردەستکرد، لە پاش ئەوەی کە بۆ ماوەی نزیکەی مانگێک وەشانەکان لە ژێر دۆخی تاقیکاریدا مابوونەوە.

قەبارەی وەشانی iOS 13.4 نزیکەی 985 مێگابایتە بۆ iPhone 11 Pro Max و بۆ ئایفۆنە کۆنەکانی دیکە قەبارەی کەمترە.

گرنگترین نوێکارییەکانی وەشانەکانی iOS 13.4 و iPadOS 13.4:

• پشتگیری لە Trackpad ـی ئایپادە نوێیەکان:

لەگەڵ ڕاگەیاندنی نەوەی چوارەمی iPad Pro، ئەپڵ تەختەکلیلێکی زیرەکیشی بە هەبوونی Trackpad ـەوە ڕاگەیاند. وەشانی نوێی iPadOS 13.4 پشتگیری ئەو جوڵێنەرە بۆ ئایپادەکان زیاد دەکات.

• هاوبەشیپێکردنی بوخچەکان لە iCloud Drive:

هاوبەشیپێکردنی بوخچەکانی iCloud Drive لەگەڵ ڕاگەیاندنی وەشانی iOS 13 ـەدا ڕاگەیاندرا، بەڵام ئەپڵ بەردەستکردنی تایبەتمەندییەکەی دواخست و دواجار لەم وەشانە نوێیانەدا ئەم تایبەتمەندییەش بەردەستکرا، کە دەتوانیت بوخچەکان هاوبەشی پێ بکەیت و بیاننێریت بۆ هەر کەسێک کە دەتەوێت.

• کڕینی گشتگیر لە نێوان iOS و Mac:

وەشانەکانی iOS 13.4 و iPadOS 13.4 خاوەن تایبەتمەندی کڕینی گشتگیرن لە نێوان iOS و Mac، کە ئیدی لەمەودوا بەکارهێنەران دەتوانن لە iOS ئەپێک بکڕن و لە Mac ـیش بەکاری بهێننەوە بە بێ ئەوەی پێویست بکات دووبارە بۆ Mac بیکڕیتەوە، یاخود بە پێچەوانەوە.

• شریتی ئامراز بۆ ئەپی Mail:

لە وەشانە نوێیەکاندا، ئەپڵ شریتی ئامرازی بۆ ئەپی Mail زیاد کردووە، کە دەتوانرێت لە ڕێگەیەوە کردارەکان خێراتر ئەنجام بدرێن.

زیاتر:

• زیادکردنی پشتگیری Magic Keyboard بۆ ئایپادەکان.
• زیادکردنی پشتگیری Magic Mouse و Magic Mouse 2 و Magic Trackpad و Magic Trackpad 2 و ماوسە بە وایەر و بێوایەرەکانی دیکە.
• زیادکردنی 9 لەزگەی نوێ بۆ Memoji.
• زیادکردنی پشتگیری AR Quick Look بۆ پەڕگەکانی USDZ.
• چارەسەرکردنی کەلێنی Screen Time Communication Limits.
• چارەسەرکردنی وردە کێشەی زیاتر.

---

چۆنیەتی نوێکردنەوەی وەشان لە iOS:

• کردنەوەی ئەپی Settings.
• کردنەوەی بەشی General.
• کردنەوەی بەشی Software Update.
• کرتە کردن لە Download and install.

تێبینی بۆ نوێکردنەوەی وەشان:

• پێویستە وزەی پاتری ئامێرەکەت لە 50% زیاتر بێت.
• پێویستت بە ئینتەرنێتی وایفای هەیە بۆ نوێکردنەوەی وەشان.