ئۆفیسی ٢٠١٦ بەفەرمی بڵاوکرایەوە

دوێنێ سێ شەممە کۆمپانیای مایکرۆسۆفت بە فەرمی ڕایگەیاند کە دەستیان کردووە بە بڵاوکردنەوەی ئۆفیسی ٢٠١٦ لە سەرتاسەری جیهان. سەرەتای نمایشی ئەم وەشانەی ئۆفیس دەگەڕێتەوە بۆ مانگی کانوونی دووەمی ئەمساڵ و پاشان وەشاندنی وەشانی ئەزموونی لە مانگی ئازاری ئەم ساڵ. بێگومان وەشانی ئەزموونی خۆڕایی بوو بەڵام ئەمەیان فەرمییە و لەبەرامبەر بەکارهێنانی پێویستە بیکرێت یان بەشداری لە ئۆفیسی ٣٦٠ بکەیت. لە ڕاستیدا ئەوەی مایکرۆسۆفت لە ئۆفیسی ٢٠١٦ ئەنجامی داوە چاوەڕوان نەکراوە و دەیان نوێکاری و تازەکاری لە بەرنامەکانی ئەم خێزانە ئەنجامداوە. یەکێک لە هەرە نایابترین نوێکارییەکان بۆ نمونە لە بەرنامەی وۆردا چەندین کەس دەتوانن لە شوێنی جیاجیاوە لەسەر یەک فایل کاربکەن و لەکاتی ئیشکردنیش دیارە کێ و کامەیان ئەو دێرە دەنوسێت و ناوەکانیان لەبەرچاوتە! هەروەها تێکهەڵکیشکردنی چاتی ڕاستەوخۆی سکایپ و ئەمانە و چەندینی تریش لەم وەشانە نوێیەی ئۆفیس دەبینرێن، ئیتر بەردەستکردنی ئەو کۆمەڵە بەرنامەیە لەسەر تەواوی سیستەمەکانی مۆبایل و تابلێت و لاپتۆ و کۆمپیوتەری ڕوومێزی خۆی بۆ خۆی دەستکەوتێکی گەورەیە بۆ مایکرۆسۆفت.

شایەنی باسە ئەم کۆمەڵە بەرنامەیە پێکدێت لە وۆرد و پاوەڕپۆینت و ئێکسڵ و ئەکسس و چەند بەرنامەیەکی تریش و لە ئێستادا بە ٤٠ زمان بەردەستن و لەم وەشانەدا مایکرۆسۆفت بەتەواوی بۆ تاچی واتە لەمسی گونجاندوون و دەتوانرێت لە ویندۆز ٧ سێرڤس پاک ١ بەرەوسەر دابەزێندرێن و بۆ ئیشکردنیشیان پێویستە کۆمپیوتەرەکەت خێرایی لە ١ گێگاهێرتز زیاتر بێت و ڕامی لە ٢ گێگابایت کەمتر نەبێت و ڕوونی شاشەکەی لە ٧٠٠*١٢٨٠ پێکسڵ کەمتر نەبێت. جێگای ئاماژەیە نرخی Office 2016 Home & Student دەگاتە ١٤٩ دۆلار و بۆ Office 2016 Home & Business دەگاتە ٢٢٩ دۆلار. هەر دوێنێش لەگەڵ بەردەستکردنی وەشانی ئۆفیسی ٢٠١٦ بۆ ویندۆز، مایکرۆسۆفت فرۆشتنی ئۆفیسی ٢٠١٦ بۆ ماک کە ماوەیەک لەمەوبەر ڕاگەیاندرا بە تەنها بە هەمان نرخی ئۆفیسی ٢٠١٦ ویندۆز بەردەست کرد.

بۆ زانینی بڕێک لە نوێکارییەکان سەیرێکی ئەم ڤیدیۆیە بکەن مایکرۆسۆفت بۆ ئۆفیسی ٢٠١٦ دروستی کردووە:

https://www.youtube.com/watch?v=0x3iA746WBE

سەرچاوە VentureBeat

سەردار عبدالله

تەکنەلۆژیا بەشێکە لە ژیانم و ساڵانێکە هەواڵ و زانیاری بە زمانی کوردی دەنوسم و لە چەندین ماڵپەڕ و گۆڤار بڵاوم کردوونەتەوە و ئێستاش لێرە هەم نوسەر و هەمیش بەڕێوەبەری گشتیم بۆ ماوەی زیاتر لە ٦ ساڵە. ئیتر گرافیک دیزاینەریشم لە ئاستێکی باشدا و لە پای ئەم ئیشانەشدا مامۆستای زانکۆم! کرتە لە وێنۆچکەی تۆڕە کۆمەڵایەتییەکانم بکەن بۆ ئەوەی زیاتر بمناسن!