کۆمپانیای Hisense تەلەڤیزیۆنێکی نایابی ڕاگەیاند

کۆمپانیای هایسینسی چینی دوێنێ تەلەڤیزیۆنێکی ئاست بەرزی ڕاگەیاند کە بووە جێگەی سەرنجی زۆرێک لە خەڵک.

ئەم بەرهەمە نوێیە ناوی 100L8Dیە و خاوەنی ڕوونمایەکە لە لایەن Screen Innovations دروستکراوە بە قەبارەی ۱۰۰ ئینچ و ڕوونی 4K Ultra HD، ئەم ڕوونمایە زیاتر لە ۸ ملیۆن پێکسڵی لەخۆ گرتووە و تەکنەلۆژیای لەیزەری تیادا بەکارهێنراوە کە دوو سودی هەیە:

۱.نیشاندانی ڕەنگەکان بە بەکارهێنانی ئەم تەکنەلۆژیایە زۆر سروشتیتر و ڕوونترە بە هۆی ئەوەی کە تیشکی لەیزەر بەهێز و گەشاوەترە.

۲.تەمەنی هەر پێکسڵێک بە بڕی زیاتر لە ۲٠،۰۰۰ کاتژمێر (بەنزیکەیی دووساڵ و نیو) بەرزدەکاتەوە کە ئەمە بە بەراورد بە تەلەڤیزیۆنەکانی تر زۆر زیاترە.

هەرچی سیستەمی بڵندگۆی تەلەڤیزیۆنەکەیە ئەوا کۆمپانیای Harman Kardon بڵندگۆیەکی ۲.۱ی جێگیرکردووە بۆ تەلەڤیزیۆنەکە و دواتریش دوو بڵندگۆی تری لەناو Projector Box جێگیرکردووە کە هەموو ئەم بڵندگۆیانە جۆریەتیەکی بەرز لەدەنگ دەبەخشن.

لەگەڵ ئەوەشدا ئەم تەلەڤیزیۆنە زیرەکە و پشگیری بەکارخستنی YouTube،Netflix ،Amazon Video و Pandora دەکات، بەڵام تائێستا کەس زانیاری نییە ئاخۆ پشتگیری HDR10 دەکات یاخود نا.

هەرچی نرخی تەلەڤیزیۆنەکەیە ئەوا کۆمپانیا چینیەکە بڕی ۹،۹۹۹$ی داناوە وەکو نرخ بۆی کە بەڤبەراورد بە بەرهەمی کۆمپانیاکانی تری وەکو  سۆنی و سامسۆنگ و تەنانەت ئێڵ جیش خاوەن تایبەتمەندی زۆر باش و نرخێکی زۆر گونجاوە، بڕیارە لە ۲٤/۱۱ تەلەڤیزیۆنە نوێیەکان بگەن بە بازاڕەکان.

پەنهان ئەحمەد

ناوم پەنهان ئەحمەدە و خوێندکاری بەشی تەکنەلۆژیای زانیاریم، وەکو نوسەرێکی پێشکەوتوو لەم ماڵپەڕە کاردەکەم و ئامانجم ئاشناکردنی کوردە بەم زانست و جیهانە نوێیە کە بەبەراورد بە بوارەکانی تر بەشێوەیەکی ئەوتۆ گرینگی پێنادرێت، یارییە ئەلیکترۆنیەکان بەشێکی تری خولیاکانی منە و بەشێوەیەکی بەردەوام ئاگاداری تازەترین هەواڵەکانی ئەم جیهانەم.