ئێستا iMac Pro بەردەستە لە ٤.٩٩٩ دۆلارەوە دەست پێدەکات تا ١۳.١٩٩ دۆلار!

چاوەڕوانییەکە کۆتایی هات و خوازیاران ئێستا دەتوانن iMac Pro داوا بکەن!

نرخەکان دەست پێدەکەن لە:

٤٩٩٩ دۆلار بۆ جۆری ٨ ناوک

٥٧٩٩ دۆلار بۆ جۆری ١٠ ناوک

٦٥٩٩ دۆلار بۆ جۆری ١٤ ناوک

٧٣٩٩ دۆلار بۆ جۆری ١٨ ناوک

جۆری ٨ ناوک و ١٠ ناوک لە کۆتایی ئەم مانگەوە دەگەنە دەست کڕیارانی ویلایەتە یەکگرتووەکان، جۆرەکانی ١٤ ناوک و ١٨ ناوک تا مانگی ٢ ناگەنە دەستی کڕیاران.

جگە لە جۆری ناوکەکان، کۆمەڵێک لایەنی دیکەش هەیە کە دەتوانیت بە خواستی خۆت گۆڕانکاری تیادا بکەیت وەک ڕام و بیرگە و گرافیک کارد، گرانترین جۆری کۆمپیوتەرەکە نرخی ١٣،١٩٩ دۆلارە و خاوەن پڕۆسێسەرێکی ١٨ ناوکی و ١٢٨ گێگابایت ڕام لە جۆری ECC و ٤ تێرابایت لە بیرگەی SSD و گرافیک کاردێکە لە جۆری AMD Radeon Pro Vega 64 کە خاوەن ١٦ گێگابایت (memory) تایبەتە لە جۆری HBM2.

ئەم کۆمپیوتەرە ئێجگار زۆر بەهێزە و بۆ کاری قورس و پیشەگەرانە گونجاوە، بەڵام گەورەترین کێشەی ئەوەیە کە بەکارهێنەر بە هیچ شێوەیەک ناتوانێت کۆمپیوتەرەکە (upgrade) بکات، واتا ناتوانیت هیچ کام لە پێکهاتەکانی وەک ڕام و بیرگە و هتد… بگۆڕیت، ئەمە لە کاتێکدایە زۆرینەی کۆمپیوتەرە هاوشێوەکانی iMac Pro کە کۆمپانیاکانی دیکە دروستیان دەکەن ئەو توانایە بە بەکارهێنەر دەبەخشن.

iMac Pro خاوەن ٤ دەرچەی جۆری Thunderbolt 3یە، دەتوانرێت لە هەمان کاتدا ٢ ڕوونمای دەرەکی 5K یان چوار ڕوونمای دەرەکی 4Kی پێوە پەیوەست بکرێت.

کڕیار لەگەڵ کۆمپیوتەرەکەدا ماوسێکی بێ وایەر و تەختەکلیلێکی بێ وایەریش بەدەست دەخات.