ئەپی بەناوبانگی تێبینییەکان Evernote بۆ ئەندرۆید دۆخی تاریکی بۆ بەردەست کرا

لەم ساڵانەی دواییدا ئەپەکان تەنها یەک ڕووکاریان نییە، کە بە زۆری لە پێشدا ڕووکاری ڕووناک و سپی بووە، بەڵکو زۆربەیان ڕووکاری تارکیشیان بۆ بەردەست کراوە. بۆ نمونە ئەپەکانی گووگڵ خاوەنی دیزایینی مەتێریاڵن و بە سپی داپۆشراون، بەڵام زۆربەیان دۆخی تاریکیان بۆ بەردەست کراوە و لە لایەن بەکارهێنەرانەوە دڵخوازترینە لە ئێستادا، کە کۆمەڵێک هۆکار لە پشتی بەکارهێنانی ئەم دۆخی تاریکەوەن، وەکو تەمەنی پاتری درێژتر دەکات و چاو دەپارێزێت … هتد.

ئەوەتا دەستەی پەرەپێدەری ئێڤەرنۆوتی بەناوبانگی بواری تێبینیش، بە هەمان شێوە بیریان لە بەکارهێنانی ئەو دۆخە تاریکە لەسەر ئەپەکەیان بۆ ئەندرۆید کردووەتەوە و لە وەشانی ٨.٦ـی بۆ بەکارهێنەران بەردەستیان کردووە، کە چالاککردنی زۆر ئاسانە و لە ڕێگەی لیستی سەرەکیەوە دەتوانیت دۆخی تاریکەکە چالاک بکەیت.

هەروەک لە لایەکی ترەوە، ئەپە ڕکابەرەکانی وەکو Google Keep و OneNote ئەو دۆخەیان بۆ بەردەست نییە لە ئێستادا، بەڵام لێپرسراوێکی گووگڵ ئاماژەی کردووە کە ئەپی Keep بەم زووانە ئەم دۆخەی پێ دەگات، و سەبارەت بە ئەپی وەن نۆوتی مایکڕۆسۆفتیش، ئەوا هیچ زانیاریەک لەو بارەیەوە لە ئارادا نییە.

بۆ داگرتنی دوایین وەشانی ئێڤەرنۆوت لەسەر گووگڵ پلەی کرتە لەم بەستەرە بکە.

سەردار عبدالله

مامۆستای زانکۆ و هەڵگری ماستەر لە فێرکردنی زمانی ئینگلیزی و تەکنەلۆژیا. ساڵانێکە هەواڵ و زانیاری بە زمانی کوردی دەنوسم و ئێستاش لێرە هەم نوسەر و هەمیش بەڕێوەبەری گشتیم بۆ ماوەی زیاتر لە 8 ساڵە. هەروەک گرافیک دیزاینەریش خەونی منە! کرتە لە وێنۆچکەی تۆڕە کۆمەڵایەتییەکانم بکەن بۆ ئەوەی زیاتر بمناسن!