مایکڕۆسۆفت کار لەسەر ئامرازێکی نوێ دەکات بۆ پشکنینی پەڕگەی exe. پێش کردنەوەیان

لە کۆنەوە کۆمەڵێک ئامرازی جیاجیا بەردەستن، کە بە Remote Desktop یان Virtual PC ناسراون، و بەکارهێنەران سودیان لێوەردەگرن بۆ تاقیکردنەوەی پەڕگەی متمانە پێ نەکراو، بە تایبەتی ئەو پەڕگانەی کە هەڵگری پاشگری exe.ـن و هاوشێوەی نەرمەواڵە ئاساییەکانی سیستەمی ویندۆزن، بەڵام لە هەمان کاتدا دەکرێت هەڵگری نێوەڕۆکی زیانبەخش بن و ببنە هۆی زیان گەیاندن بە سیستەمی ویندۆز.

بەم بۆنەیەوە، مایکڕۆسۆفت دەستیکردووە بە پەرەپێدانی ئامرازێک بە ناوی Windows Sandbox کە ئامانج لێی بەردەستکردنی ژینگەیەکی خەیاڵییە کاتییە بۆ ئەوەی پەڕگەی نەناسراو و متمانە پێنەکراو تاقیبکەیتەوە و پشکنینیان بۆ بکەیت پێش ئەوەی لەسەر سیستەمی کۆمپیوتەرەکەت جێگیریان بکەیت و دایانبمەزرێنیت.

بە گوێرەی کۆمپانیا، ئەم ئامرازە لە ساڵی داهاتوو لەگەڵ وەشانێکی نوێی ویندۆز ١٠ بەردەست دەبێت، بەڵام تەنها لەسەر وەشانی Professional و Enterprise بەردەست دەبێت. شایەنی باسە لە کاتی چالاککردنی ئەم ئامرازە، خۆکارانە دەتوانم بڵێم کۆمپیوتەرێکی خەیاڵی بە قەبارەی ١٠٠ مێگابایت لەناو سیستەمەکە دروست دەبێت و کار لەسەر پشکنین بۆ پەڕگە نەناسراوەکان دەکات لەگەڵ کردنەوەی.

سەردار عبدالله

مامۆستای زانکۆ و هەڵگری ماستەر لە فێرکردنی زمانی ئینگلیزی و تەکنەلۆژیا. ساڵانێکە هەواڵ و زانیاری بە زمانی کوردی دەنوسم و ئێستاش لێرە هەم نوسەر و هەمیش بەڕێوەبەری گشتیم بۆ ماوەی زیاتر لە ١٤ ساڵە. هەروەک گرافیک دیزاینەریش خەونی منە! کرتە لە وێنۆچکەی تۆڕە کۆمەڵایەتییەکانم بکەن بۆ ئەوەی زیاتر بمناسن!