هواوەی لاپتۆپی MateBook 13 ـی بۆ ڕکابەری Apple MacBook Air نمایشکرد

کۆنگرەی CES 2019 بەردەوامی هەیە و کۆمپانیاکان بەرهەمە نوێیەکانیان نمایش دەکەن، بۆ ئەم مەبەستەش هواوەی لاپتۆپی MateBook 13 ـی بە نرخێکی کەمەوە بۆ ڕکابەری MacBook Air ـی ئەپڵ نمایشکرد. هواوەی دەیەوێت لە بازاڕی کۆمپیوتەر و لاپتۆپەکانیشدا لە ڕکابەری کردنی ئەپڵ و کۆمپانیایەکانی دیکە بەردەوام بێت.

لاپتۆپە نوێیەکەی هواوەی قەبارەی ١٣ ئینجە بە ڕوونی 2K و وردی نیشاندانی ٢١٦٠ x ١٤٤٠، بە دوو بژاردە بەردەست دەبێت و بژاردەی یەکەمی لاپتۆپەکە؛ خاوەن نەوەی هەشتەمی پڕۆسێسەری Intel Core i5-8265U دەبێت لەگەڵ ڕامێک بە فراوانی ٨ گێگابایت و بیرگەی ناوەکی لە جۆری SSD بە قەبارەی ٢٥٦ گێگابایت و گرافیک کارتی جۆری Intel UHD Graphics 620. 

بژاردەی دووەمی لاپتۆپەکەی هواوەی خاوەن نەوەی هەشتەمی پڕۆسێسەری Intel Core i7 8565U دەبێت لەگەڵ ڕامێک بە فراوانی ٨ گێگابایت و بیرگەی ناوەکی لە جۆری SSD بە قەبارەی ٥١٢ گێگابایت و گرافیک کارتی جۆری NVIDIA GeForce MX150.

کێشی لاپتۆپەکە ٢.٨٦ پاوەند (١.٢٩ کیلۆگرام)ـە و چوارچێوەی ڕوونمایەکەی زۆر کەمە و ڕێژەی دووری چوارچێوەی ڕوونمایەکەی لە لاشەکەوە ٪٨٨ ـە. هەروەها خاوەنی هەستەوەری پەنجەمۆرە لەسەر دووگمەی کارپێکردن. لاپتۆپەکە خاوەن ٢ دەرچەی USB-C ـە لە لای ڕاست و چەپیەوە (دەرچەکەی چەپ پشتگیری لە گواستنەوە و بارگاویکردنەوە دەکات). 

بژاردەی یەکەمی لاپتۆپەکە بە نرخی ٩٩٩ دۆلار بەردەست دەبێت و بژاردەی دووەمیش بە نرخی ١٢٩٩ دۆلار. لە کۆتاییەکانی ئەم مانگەدا کۆمپانیاکە بە دیاری ساڵێک بەژداربوونی خۆڕایی Microsoft Office 365 ـەوە بەردەستی دەکات بۆ کڕین.

ماکوان بەرزان

نووسەری پێشکەوتوو، هەوادار و گەشەپێدەری سەکۆکانی ئەپڵ.