10
ئای ئۆ ئێس 9, ئازار 2019 بۆچوون

لەمەودوا بەکارهێنەرانی PlayStation 4 دەتوانن لە ئایفۆن و ئاپیادەکانیانەوە یاری بە ئامێرەکە بکەن

ئەگەر ئامێری PlayStation 4 ـت هەیە و دەتەوێت لە ئایفۆن یاخود ئایپادەکەتەوە بەکاری بهێنیت و یاری پێبکەیت، ئێستا دەتوانیت لە ڕێگای ئەپێکی فەرمییەوە کردارەکە ئەنجام بدەیت!

زیاتر لە 4 ساڵ لەمەوبەر کۆمپانیای Sony ئەپێکی تایبەت بە بەکارهێنانی ئامێری PlayStation 4 ـی بۆ مۆبایلەکانی Sony Xperia بەردەست کرد، بەمەش تەنها بەکارهێنەرانی مۆبایلەکانی Sony Xperia دەیانتوانی PlayStation 4 ـەکانیان بەکار بهێنن. خۆشحاڵانە کۆمپانیاکە لە کۆتایدا ئەپی تایبەت بە بەکارهێنانی PlayStation 4 ـی بۆ سیستەمی iOS بەردەست کرد.

لە ڕێگای ئەپە نوێیەکەی سۆنییەوە بۆ سیستەمی iOS، دەتوانرێت بەشەکانی نێو ئامێری PlayStation 4 ببیندێت، وە لەمەودوا بەکارهێنەران دەتوانن لە ڕێگای ئەپێکی فەرمییەوە ئایفۆن و ئایپادەکانیان بکەن بە کۆنتڕۆڵ بۆ ئامێری PlayStation 4. هەروەها لە ڕێگای ئەپە نوێیەکەوە دەتوانرێت ئایفۆن و ئایپاد بکرێت بە وەرگر(مایکرۆفۆن) و گفتوگۆی دەنگیی ئەنجام بدرێت، لەگەڵ ئەوەشدا دەتوانرێت لە ڕێگای ئەپەکەوە تەختەکلیل بەکاربهێندرێت و نوسینی پێ ئەنجام بدرێت.

بەڵام ئەپەکە ڕێگە نادات کۆنتڕۆڵی DualShock 4 لەگەڵ ئایفۆن و ئایپاددا بەکار بهێندرێت. بەکارهێنانی ئەپەکە لە ڕێگای وایفایەوە دەبێت و پێویستە هەژماری PlayStation Network ـت هەبێت. زانیاریمان نییە لەسەر ئەوەی کە ئەپەکە هەمیشە لەگەڵ دواین وەشانی سیستەمی PlayStation کاردەکات یاخود نا، بەڵام وا باشترە هەمیشە PlayStation 4 ـەکەت دواین وەشان بێت بۆ ئەوەی باشتر لەگەڵ ئەپەکەدا کاربکات.

ئەپەکە لەگەڵ ئایفۆن 7 و نوێتر، ئایپاد 6 (نەوەی شەشەم) و نوێتردا کار دەکات. قەبارەی 19 مێگابایتە و گونجاوە لەگەڵ وەشانی iOS 12.1 و نوێتر. کرتە بکە بۆ داگرتنی ئەپەکە بۆ ئایفۆن و ئایپاد.

بۆچونی تۆ