ئەپ و نەرمەکاڵا

گووگڵ کۆتایی بە ئەپی Inbox دەهێنێت

کۆمپانیای گووگڵ بڕیاریدا کۆتایی بە ئەپی Inbox بێنێت، کە جێگرەوەیەکی ئەپی جیمەیڵە بۆ کردنەوەی ئیمەیڵ و ناردن و چەندین کاری تری پەیوەست بە ئیمەیڵ بە شێوەیەکی پێشکەوتوو.

شایەنی باسە، گووگڵ بە فەرمی ٢ی مانگی داهاتووی دیاریکردووە بۆ کۆتایی هێنان بەم خزمەتگوزارییە و پێشنیارکردنی ئەپی جیمەیڵ وەکو جێگرەوەی سەرەکی بۆ ئەم ئەپە. جێگەی وەبیرهێنانەوەیە، ئەم خزمەتگوزارییە ئەزمونێک بوو بۆ تاقیکردنەوەی نوێترین تایبەتمەندییەکان پێش زیادکردنیان بۆ ئەپی جیمەیڵ. بەڵام ئینبۆکس چیتر تایبەت نەما چونکە گووگڵ بڕیاریدا ئەپەکە کۆتایی پێ بهێنێت، و لەمەودوا ڕاستەوخۆ ئیش لەسەر جیمەیڵ بکات و سەرەنجی بەکارهێنەران بۆ لای ئەو ئەپە ڕابکێشێت.

گووگڵ لە ١٨ی ئەم مانگەوە پەیامی بۆ بەکارهێنەرانی ئەم ئەپە ناردووە کە لە دوای ١٥ ڕۆژی تر ئەپەکە چیتر بەردەست نامێنێت، و تێبینی ئەوەشی داوە کە بەکارهێنەران دەتوانن گشت تایبەتمەندییەکانی ئینبۆکس لە جیمەیڵ بەدەست بخەن و چێژ لە بەکارهێنانی وەرگرن.

بۆ ئەوەیشی گووگڵ دڵنیا بێتەوە بەکارهێنەران ڕوو لە ئەپی جیمەیڵ دەکەن، لە پەیامەکەدا بەستەرێک هاوپێچ کراوە تا بەکارهێنەران بیکەنەوە و ئەپی جیمەیڵ لەسەر ئامێرەکانیان جێگیر بکەن.

لە ڕاستیدا، لەگەڵ دوا وەشانی جیمەیڵ بە تەواوی لە ئەپی ئینبۆکس دەچێت، و گشت تایبەتمەندییەکانی ئەو ئەپەی بۆ بەردەست کراون، ئەمەش وادەکات بەکارهێنەران بە ئاسانی خۆیان لەگەڵی بگونجێنن و هەوادارانی خۆیان لەدەست نەدەن.

 

سەرچاوە :

9to5Google, TechWD

20 ئازار، 2019
ئاڤاتار
تەکنەلۆژیا بەشێکە لە ژیانم و ساڵانێکە هەواڵ و زانیاری بە زمانی کوردی دەنوسم و لە چەندین ماڵپەڕ و گۆڤار بڵاوم کردوونەتەوە و ئێستاش لێرە هەم نوسەر و هەمیش بەڕێوەبەری گشتیم بۆ ماوەی زیاتر لە ٦ ساڵە. ئیتر گرافیک دیزاینەریشم لە ئاستێکی باشدا و لە پای ئەم ئیشانەشدا مامۆستای زانکۆم! کرتە لە وێنۆچکەی تۆڕە کۆمەڵایەتییەکانم بکەن بۆ ئەوەی زیاتر بمناسن!
1114