کۆمپیوتەر

کۆمپانیای Asus لاپتۆپی ZenBook Duo و ZenBook Pro Duo ـی بە 2 ڕوونمای 4K ـییەوە ڕاگەیاند

وا دیارە ئەمساڵ ساڵی ڕوونما دووانییەکانە. کۆمپانیای Asus لە کۆنگرەی Computex ـدا لاپتۆپەکانی ZenBook Duo و ZenBook Pro Duo ـی بە 2 ڕوونمای 4K ـییەوە ڕاگەیاند. بەڵێ، 2 ڕوونما!

ڕوونمای یەکەمی هەردوو لاپتۆپەکە قەبارەیان 15.6 ئینجە لە جۆری OLED و بە ڕوونی 4K. هەروەها ڕوونمای دووەمیان کە لە سەروو تەختەکلیلەوەیە، بە ScreenPad Plus ناو دەبرێت و قەبارەی 14 ئینجە بە چێوەی 32:9 و ڕوونی 4K ـە. لاپتۆپی ZenBook Pro Duo خاوەن پڕۆسێسەری Intel Core i9 HK و کارێکی گرافیکە لە جۆری NVIDIA RTX 2060.

دەتوانیت لە ڕوونمای دووەمدا، کردارە پێویستەکان ئەنجام بدەیت و چەند ئەپێک لە یەک کاتدا بکەیتەوە. ڕوونماکە جێگای تەختەکلیلی نەگرتووە و تەختەکلیلەکەی بە پڕاوپڕ لە خوارەوە لە جێگای خۆیەتی، هەروەها تراک پادەکەشی خراوەتە بەشێکی بچووکی تەنیشت تەختەکلیل.

هەرچی دەربارەی لاپتۆپی ZenBook Duo ـە. قەبارەی ڕوونمای یەکەمی 14 ئینجە و قەبارەی ڕوونمای دووەمیشی 12.6 ئینجە. خاوەن پڕۆسێسەری Intel Core i7 و کارتێکی گرافیکی جۆری GeForce MX 250.

تاوەکو ئەم ساتە کۆمپانیای Asus نرخ و وردەکارییەکانی دیکە و ڕێکەوتی بەردەستکردنی لاپتۆپە نوێیەکانی ئاشکرا نەکردووە.

سەرچاوە :
27 ئایار، 2019
ئاڤاتار
خوێندکاری پەیمانگای کۆمپیوتەرم، شارەزایی تەواوم هەیە لە هەریەک لە سیستەمە کارپێکەرەکانی iOS و macOS و Windows. ڕۆژانە و بە بەردەوامی ئاگاداری دواین هەواڵ و گۆڕانکارییەکانی تایبەت بە تەکنەلۆژیام. ئێستا، لە کەی ئای تی ئێن سەرقاڵی نووسینی بابەتی پەیوەندیدار بە تەکنەلۆژیاوەم. دەتوانیت کرتە لە وێنۆچکەی تۆڕە کۆمەڵایەتییەکان بکەیت ئەگەر خوازیاریت پەیوەندیم پێوە بکەیت یاخود ئاگات لە دواین چالاکییەکانم ببێت.
599