ڕۆڵ و کاریگەری تەکنەلۆژیا لە بواری تەندروستیدا گەیشتووەتە چ ئاستێک؟

بە درێژایی ساڵانی ڕابردوو تەکنەلۆژیا گۆڕانکارییەکی زۆری ئەرێنییی لە بواری تەندروستیدا کردووە، هەر لە دیاریکردنی جۆری نەخۆشییەکانەوە تاوەکوو شێوازەکانی چارەسەرکردن و کەم کردنەوەی ئازاری نەخۆشەکان و زووتر چاکبوونەوەیان.

ئەمانە کۆمەڵێک لە بەرەوپێشچوونەکانی تەکنەلۆژیان لە کەرتی تەندروستیدا:

-بە دیجیتاڵکردنی فایلە تەندروستییەکان

ڕۆژ لە دوای ڕۆژ تۆماری دیجیتاڵی زیاتر و زیاتر جێگای تۆماری کاغەز دەگرنەەوە کە هەمیشە ئەگەری لەناوچوونی هەیە، تۆمارە دیجیتاڵییەکان لە ناو خزمەتگوزارییە هەورییەکاندا هەڵدەگیرێن و نەخۆش و پزیشکەکان لە هەر شوێنێکبن دەتوانن دەستیان پێیان بگات.

-ئەپەکانی مۆبایل لە بواری تەندروستی

جگە لەوەی نەخۆشەکان دەتوانن لە ڕێگای مۆبایلەکانیان و ئینتەرنێت دەستیان بگات بە زانیاری تەندروستی ڕاست و باوەڕپێکراو، دەشتوانن لە ڕێگای جۆرەها ئەپی بەسوودەوە چاودێری کات و بەرواری دیدارەکانیان لەگەڵ پزیشکدا بکەن، وەبیر بخرێنەوە کە دەرمانەکانیان وەرگرن، ئەمە جگە لە ئەپەکانی چاودێری چالاکی کە بەردەوام زانیاریت دەدەنێ لەسەر جووڵە و چالاکییەکانت و خواردنت.

-تەکنەلۆژیای زانیاری و پەیوەندی

تەکنەلۆژیای زانیاری و پەیوەندی بەردەوام لە پێشکەوتن و گەشەدایە و ئێستا ڕێگا بە نەخۆشەکان دەدات لە هەر کوێیەکی جیهانبن و چەندێک دووربن پەیوەندی بە پزیشکەکانەوە بکەن و سوودیان لێ وەربگرن، ڕێگاش دەدات بە نەخۆشەکان کە دڵنیا ببنەوە لە بەردەست بوونی چارەسەر بۆیان لای پزیشکێکی دیاریکراو یاخود وڵاتێکی دیاریکراو پاشان گەشت کردن بۆی نەوەک بە پێچەوانەوە.