10
ئەندرۆید 27, ئه‌یلول 2019 بۆچوون

گووگڵ وەشانی Android 10 Go ـی بۆ مۆبایلە ئاست نزمەکان بە خاوەن خێراییەکی زۆرەوە ڕاگەیاند

لە پاش ئەوەی وا خەریکە 2 ساڵ تێپەڕ دەکات بەسەر ڕاگەیاندنی سیستەمی Android Go لە لایەن گووگڵەوە بۆ مۆبایلە ئاست نزم و هەرزانەکان، کۆمپانیاکە وەشانی Android 10 Go ـی بە خاوەن خێراییەکی زۆرەوە ڕاگەیاند.

گووگڵ درک بەوە دەکات کە هیچ نوێکارییەکی دیاری لە وەشانەکەدا ئەنجام نەداوە، بەڵکو بە تەواوی تیشکی خستۆتە سەر خێرایی و توانای سیستەمەکە. دەگوترێت Android 10 Go ـی نوێ لە توانایدا دەبێت بە ڕێژەی 10% ئەپەکان خێراتر بکاتەوە، هەروەها قەبارەی ئەپە بنەڕەتییەکان دەکات بە نیوە بۆ ئەوەی بەکارهێنەر بڕێکی زۆری فراوانی بیرگەی بۆ بگەڕێتەوە. سیستەمەکە توانای دەبێت لەسەر مۆبایلێکی خاوەن ڕامی 1.5 گێگابایت و کەمتریش کار بکات.

هەروەکو وەشانی پێشووتری، ئەم وەشانە نوێیەی Android Go ـیش بە شێوەیەکی بنەڕەتی خاوەن ئەپەکانی Google Go ـی وەکو Gallery Go و YouTube Go و Maps Go و Google Files و زیاتر دەبێت. هەروەها پشتگیری لە هاوبەشیپێکردنی پەڕگەکان بە شێوەی ڕاستەوخۆ لە نێوان ئامێرەکاندا دەکات و گرنگی بە باشترکردنی زانیارییەکان دراوە.

گووگڵ سیستەمی Android Go تاوەکو ئێستا لە لایەن 500 کۆمپانیا و لە 180 وڵاتی جیاواز و لەسەر زیاتر لە 1,600 مۆدێلی جیاوازی مۆبایلی ئاست نزم و هەرزاندا بەکارهاتووە، ئەمەش مانای سەرکەوتویی سیستەمەکە ئاشکرا دەکات.

وا بڕیارە لە کۆتاییەکانی ئەمساڵدا دەست بکرێت بە بەردەستکردنی مۆبایلە کارکردووەکان بە وەشانی نوێی Android 10 Go.

سەرچاوە :
بۆچونی تۆ