کۆمپانیای Acer نەوەیەکی نوێ لە لاپتۆپی Swift 7 بە تەنکییەکی زیاتر و کێشێکی کەمترەوە نمایش دەکات

ساڵی ڕابردوو کۆمپانیای ئەیسەر لاپتۆپی Swift 7 ـی لە کۆنگرەی CES 2018 نمایش کرد، بۆ ئەمساڵیش کۆمپانیاکە دەیەوێت لە هەمان کۆنگرەدا پەردە لەسەر نەوەیەکی نوێی لاپتۆپی Swift 7 بە تەنکییەکی زیاتر و کێشێکی کەمترەوە لابدات.

نەوە نوێیەکەی لاپتۆپی Swift 7 قەبارەی ١٤ ئینج دەبێت و ڕوونمایەکەی لەمس دەبێت، چوارچێوەی ڕوونمای لاپتۆپەکە زۆر کەم کراوەتەوە و لێوارەکانی تیژن و کێشی تەنها ١.٩٦ پاوەن دەبێت، هەروەها ئەستووری لاپتۆپەکە تەنها ٩.٩٥ میلیمەتر دەبێت بەمەش دەبێتە یەکێک لە تەنکترین لاپتۆپەکانی جیهان. 

نەوە نوێیەکەی Swift 7 پڕۆسێسەری نەوەی هەشتەمی ئینتێڵ Core i7 ـی لەسەر جێگیر دەبێت، خاوەنی ڕامێک دەبێت بە فراوانی ٨ گێگابایت و بیرگەیەکی ناوەکی لە جۆری SSD بە فراوانی ٢٥٦ گێگابایت. 

لاپتۆپەکە خاوەن دوو دەرچەی USB-C دەبێت لە ڕاستەوە و پشتگیری لە Thunderbolt 3 دەکەن، هەروەها خاوەن دەرچەیەکی بیستۆک دەبێت لە لای چەپەوە. تەختەکلیلی لاپتۆپەکە خاوەن ڕووناکی دەبێت لە ژێرەوە و لاپتۆپەکە خاوەنی هەستەوەری پەنجەمۆری Windows Hello دەبێت لەسەر دووگمەی هەڵکردن. لەگەڵ ئەوەشدا باتری لاپتۆپەکە بەرگەی ١٠ کاتژمێر کارکردنی بەردەوام دەگرێت.

وا چاوەڕوان دەکرێت کۆمپانیاکە لە کۆنگرەی چەند ڕۆژی داهاتووی CES 2019 ـەدا لاپتۆپەکە نمایش بکات، لە پاشان و لە مانگی ٤ ـی ئەمساڵەوە لە ئەوروپا و ڕۆژهەڵاتی ناوەڕاست و ئەفریقا و چین و لە مانگی ٥ ـیشدا لە باکوری ئەمریکا بە نرخی ١٧٠٠$ بەردەستی بکات.

ماکوان بەرزان

نووسەری پێشکەوتوو، هەوادار و گەشەپێدەری سەکۆکانی ئەپڵ.