ئەپڵ وەشانی iOS 12.3.2 ـی بە چارەسەرکردنی کێشەیەکەوە بە تەنها بۆ بەکارهێنەرانی iPhone 8 Plus بەردەستکرد

لە دوای تێپەڕبوونی چەند هەفتەیەک بەسەر بەردەستکردنی وەشانی iOS 12.3.1، ئەپڵ وەشانی iOS 12.3.2 ـی بە چارەسەرکردنی کێشەیەکەوە بەردەستکرد، بەڵام بە تەنها بۆ بەکارهێنەرانی ئامێری iPhone 8 Plus.

وەشانی iOS 12.3.2 وەشانێکی چارەسەرکەرە و بە تەنها ڕەوانەی بەکارهێنەرانی iPhone 8 Plus کراوە. وەشانە نوێیەکە چارەسەری کێشەی دۆخی پۆرترەیت (Portrait mode) ـی لە ئەپی Camera ـدا کردووە کە ڕووبەڕووی ژمارەیەک لە بەکارهێنەرانی iPhone 8 Plus ببووەوە، کێشەکە ببووە هۆی لە کار خستنی هەستەوەری قوڵی لە کاتی چرکاندنی وێنەدا، بەمەش بەشێک لە وێنەکە لێڵ نەدەبوو و لەو کاتەدا دۆخەکە بێسوود بە دیار دەکەوت.

ئێستا وەشانەکە بۆ سەرجەم بەکارهێنەرانی iPhone 8 Plus بەردەستە و دەتوانیت بە یارمەتی ئەم هەنگاوانەی خوارەوە وەشانەکە دابگریت:

• کردنەوەی ئەپی Settings
• کردنەوەی بەشی General
• کردنەوەی بەشی Software Update
• کرتە کردن لە Download and install

تێبینی بۆ نوێکردنەوەی وەشان:

• پێویستە وزەی پاتری ئامێرەکەت لە 50% زیاتر بێت.
• پێویستت بە ئینتەرنێتی وایفای هەیە بۆ نوێکردنەوەی وەشان.

ماکوان بەرزان

نووسەر، بەڕێوەبەری نووسین، گەشەپێدەر و خوێندکاری پەیمانگەی زانستی کۆمپیوتەر.