شاومی نموونەی مۆبایلی Mi Mix Alpha ـی بە ڕوونمایەکی چەماوەیی نوێوە ڕاگەیاند

لە کۆنگرەیەکی تایبەتدا و لە پاڵ نمایشکردنی مۆبایلی مۆبایلی Mi 9 Pro 5G، کۆمپانیای شاومی نموونەی مۆبایلی Mi Mix Alpha ـی بە ڕوونمایەکی چەماوەیی نوێوە ڕاگەیاند. چاوەڕوانییەکان لە ڕوونمای جۆری تاڤگەیی (Waterfall) دەرچوون و شاومی جۆرێکی نوێی ڕوونمای بۆ مۆبایلە نوێیەکەی بەکارهێناوە.

لە مۆبایلی نوێی Mi Mix Alpha ـدا، شاومی ڕوونمای جۆری Surround Screen ـی تێدا بەکارهێناوە کە جۆرێکی چەماوەییە و بە ڕێژەی 180% ـی لاشەی مۆبایلەکەی گرۆتەوە. ڕوونماکەی بە شێوەیەک کار دەکات، کە دەتوانیت لە کاتی بەکارهێنانی ئەپێک، مۆبایلەکە هەڵبگێڕیتەوە بۆ پشتەوە و چەند ئەپێکی دیکەی جیاواز بەکاربهێنیت.

شاومی لە مۆبایلی Mi Mix Alpha ـدا هەستەوەری نوێی 108 مێگاپێکسڵی کۆمپانیای سامسۆنگی بۆ کامێراکەی بەکارهێناوە، کە مۆبایلەکە دەکاتە خاوەن کامێرایەکی ڕوون 108 مێگاپێکسڵی. هەستەوەرەکە پێکسڵەکان 2 جارانی 2 دەکات بۆ بەدەستهێنانی ڕووناکییەکی باشتر لە دۆخە تاریکەکاندا و وێنەیەکی 27 مێگاپێکسڵی بەرهەم دەهێنێت.

مۆبایلەکە خاوەن کامێرای پێشەوە نییە، چونکە پێویست ناکات. لە کاتی خواست بۆ چرکاندنی وێنەی سێڵفی، تەنها مۆبایلەکە هەڵدەگێڕیتەوە.

سەبارەت بە تایبەتمەندییەکانی، مۆبایلەکە خاوەن پڕۆسێسەری +Qualcomm Snapdragon 855 و ڕامێک بە فراوانی 12 گێگابایت و بیرگەیەکی ناوەکی بە قەبارەی 512 گێگابایتە. هەروەها پشتگیری لە نەوەی پێنجەمی پەیوەندی 5G دەکات. خاوەن پاترییەک دەبێت بە توانستی 4,050 ملی ئەمپێر و پشتگیری لە بارگاویکردنەوەی خێرا بە توانای 40 وات دەکات.

شاومی مۆبایلەکەی وەکو نموونەیەک نیشاندا، هەر بۆیە چاوەڕوان ناکرێت ژمارەیەکی زۆری لێ بەرهەم بهێندرێت. لەمساڵدا دەست بە بەرهەمهێنانی دەکرێت و لە مانگی 12 ـی ئەمساڵدا بە نرخی 2,800$ دەست بە فرۆشتنی دەکرێت.

ماکوان بەرزان

بەڕێوەبەری نووسین و نووسەرم لە کەی ئای تی ئێن. خوێندکاری پەیمانگەی کۆمپیوتەرم، گەشەپێدەرم و شارەزایی تەواوم هەیە لە هەریەک لە سیستەمە کارپێکەرەکانی iOS و macOS و Windows. ڕۆژانە و بە بەردەوامی ئاگاداری دواین هەواڵ و گۆڕانکارییەکانی تایبەت بە تەکنەلۆژیام. دەتوانیت کرتە لە وێنۆچکەی تۆڕە کۆمەڵایەتییەکان بکەیت ئەگەر خوازیاریت پەیوەندیم پێوە بکەیت یاخود ئاگات لە دواین چالاکییەکانم ببێت.