ماڵئاوایی لە دوگمەی View Image و Search by Image بکەن لەسەر گەڕانی وێنەی گووگڵ

ماڵئاوایی لە دوگمە نازدارەکەی بەشی گەڕانی وێنە لە گووگڵ بکەن کە لەڕێگەیەوە ڕاستەوخۆ وێنەکانمان دەکردەوە بەبێ چوونە سەرچاوەی سەرەکی وێنەکە. دوگمەکەش View Image بوو!

ئەمڕۆ گووگڵ چەند گۆڕانکارییەکی بۆ بەشی گەڕانی وێنە ڕاگەیاند کە یەکێکیان لابردنی ئەم دووگمەیەیە کە ئاماژەی پێدرا و لەڕێگەیەوە وێنە دەکرایەوە بەبێ سەردانکردنی سەرچاوەی سەرەکی. بێگومان ئەم گۆڕانکارییەش لەدوای سکاڵاکانی Getty Images دێت لەسەر گووگڵ کە پێگەی ناوبراو پێی وایە گووگڵ بەدانانی ئەم دوگمەیە مافی ئەوانی زەوتکردووە و هیچ یەکسانییەکی لەنێوان بەرهەمهێنەران و بەکارهێنەران دەستەبەرنەکردووە. بەڵام ئەوەتا دواجار گووگڵ لە جریوەیەکیاندا لە تویتەر ئاماژە بەو گۆڕانکارییانە دەکەن کە لە بەشی گەڕانی وێنە ئەنجامیانداوە و لەنێوانیشیاندا لابردنی دووگمەی View Imageـە.

Today we’re launching some changes on Google Images to help connect users and useful websites. This will include removing the View Image button. The Visit button remains, so users can see images in the context of the webpages they’re on. pic.twitter.com/n76KUj4ioD

— Google SearchLiaison (@searchliaison) February 15, 2018

The Search by Image button is also being removed. Reverse image search *still works* through the way most people use it, from the search bar of Google Images.

— Google SearchLiaison (@searchliaison) February 15, 2018

شایەنی باسە لە ساڵی ٢٠١٦ـەوە Getty Images سکاڵای بەرزکردووەتەوە لەسەر گووگڵ لە یەکیەتی ئەوروپا و تێیدا هاتووە کە بەشی گەڕانی وێنەی گووگڵ بووەتە هۆی گزی و چەتەگەڕیی بەوەی کە ڕێگە خۆشکەرە بۆ ئەوەی بەکارهێنەران بتوانن وێنەی ڕوونی بەرز بکەنەوە بەبێ ئەوەی سەردانی سەرچاوەی سەرەکی وێنەکە بکەن. جێگای باسە هەر لەسەر هەمان بابەت بەڕێوەبەری ڕاوێژکار، Yoko Miyashita، لە Getty Images دەڵێت: “ڕەفتاری گووگڵ بەشێوەیەکی خەراپ کاریگەری نەک تەنها لەسەر بەشداربووان دەکات بەڵکو لەسەر ژیان و بژێوی هونەرمەندان لەتەواوی جیهاندا لە ئێستا و لەداهاتووشدا دەکات.”

لەکۆتاییدا و بەهۆی سکاڵاکەی Getty Images، ڕێکەوتن لە نێوان ئەوان و گووگڵ لەسەر چەند خاڵێک ئەنجامدراوە و یەکێک لەمانە هەندێک گۆڕانکارییە لەبەشی گەڕانی وێنەی گووگڵ و لابردنی دوگمە زۆر پێویستەکەی ناسراو بە View Image بۆ کردنەوەی وێنە بێ ئەوەی بچیتە ماڵپەڕی سەرەکی و هەروەها لابردنی دوگمەی گەڕان بە وێنە واتە Search by Image.

لەدوا لێدوانی گووگڵدا هاتووە کە گەڕانی وێنەی گووگڵ ڕێگەیەکی نایابە بۆ ئەو خەڵکانەی زانیاری دەدۆزنەوە کە پێیان وابێت کردنەوە و گەڕانی وێنە ئەزموونێکی باشتر بێت لە دەق و نوسین. هەروەها دەڵێت دانانی یەک دوگمەی تایبەت (Visit) بۆ ئەوەی خەڵکی بباتە سەرچاوەی سەرەکی پەیوەست بە وێنەکە بۆ بەکارهێنەران و بەرهەمهێنەران و هەروەها ئەوانەیشی کە هەڵگری مافی بڵاوکردنەوەن باشترە.

سەردار عبدالله

مامۆستای زانکۆ و هەڵگری ماستەر لە فێرکردنی زمانی ئینگلیزی و تەکنەلۆژیا. ساڵانێکە هەواڵ و زانیاری بە زمانی کوردی دەنوسم و ئێستاش لێرە هەم نوسەر و هەمیش بەڕێوەبەری گشتیم بۆ ماوەی زیاتر لە ١٤ ساڵە. هەروەک گرافیک دیزاینەریش خەونی منە! کرتە لە وێنۆچکەی تۆڕە کۆمەڵایەتییەکانم بکەن بۆ ئەوەی زیاتر بمناسن!