ئەندرۆید 16, كانونی دووه‌م 2019

گووگڵ ڕێکەوتی لەکار خستنی ئەپە 32 بتەکانی لەسەر ئامێرە 64 بتەکان دیاریکرد

کاتێک نزیکەی ٢ ساڵ لەمەوبەر ئەپڵ کارکردنی ئەپە ٣٢ بتەکانی لە وەشانی iOS 11 و بەدواوە ڕاگرت، گووگڵیش لە مانگی ١١ ـی ٢٠١٧ ـەدا ڕایگەیاند کە دەست دەکەن بە لەکارخستنی ئەپە ٣٢ بتەکان لەسەر ئامێرە نوێیەکان، بەڵام ڕاگەیەندراوەکەی گووگڵ بە بێ ئاماژەدان بە ڕێکەوتی ئەنجامدانیەوە بوو. دواجار کۆمپانیاکە لە ئەمڕۆدا ڕێکەوتی لەکار خستنی ئەپە ٣٢ بتەکانی لەسەر ئامێرە ٦٤ بتەکان دیاریکرد.

لە دوای ڕێکەوتی ١ ـی مانگی ٨ ـی ئەمساڵەوە گووگڵ بەردەوام دەبێت لە قبوڵکردنی ئەپەکان لە نێو کۆگای گووگڵ پلەیدا کە پشتگیری لە ئامێرە ٣٢ بتەکان دەکەن، لەگەڵ ئەو یارییانەش کە بە پاڵپشتی وەشانی ٥.٦ و کۆنتری بزوێنەری Unity درووست کراون.

ئەو ڕێکەوتەی کە مایەی ئاماژە پێدانە ١ ـی ٨ ـی ساڵی ٢٠٢١ ـە، لە دوای ڕێکەوتە ئاماژە پێدراوەکەدا گووگڵ ڕێگە دەگرێت لە دامەزراندنی ئەپە ٣٢ بتەکان لەسەر ئامێرە نوێ و ٦٤ بتەکان، هەروەها ئەپە ٣٢ بتەکان لە نێو کۆگای گووگڵ پلەی ئامێرە ٦٤ بتەکاندا بەدەر ناکەون. لەگەڵ ئەوەشدا لە دوای ڕێکەوتەکەوە پێویستە گشت ئەپ و یارییە نوێ و نوێکراوەکانی گووگڵ پلەی پشتگیری لە ٦٤ بت بکەن ئەگینا بە پێچەوانەوە قبوڵ ناکرێن.

یاسا نوێیەکەی گووگڵ پشتگیری کۆدی بنچینەیی نێو ئەپەکان لە سیستەمی ئەندرۆیددا دەکات، هەروەها لە ئێستاوە گووگڵ ڕێنمایی گەشەپێدەران دەکات کە ئامادە بن بۆ بەکارهێنانی کۆدی بنچینەیی ٦٤ بت بۆ ئەپەکانیان.

بۆچونی تۆ