ئەدۆبی بە یەکجاری کۆتایی بە ئەپی Adobe Shockwave دەهێنێت و چیدیکە گەشەی پێنادات

ئەپی Adobe Shockwave (سەرەتا بە ناوی Macromedia Shockwave) لە ساڵی 1995 ـەوە لە لایەن کۆمپانیای Macromind ـەوە درووستکرا و لە ساڵی 2005 کۆمپانیای ئەدۆبی بووە خاوەنی ڕاستەقینەی ئەپەکە. ئەپەکە بەکاردێت بۆ درووستکردنی یاری و ڕەنگاڵەکان لە وێب، لە ڕابردوودا چەندان یاری وێب لە ڕێگای ئەپەکەوە درووست کراون، بەڵام ئەدۆبی دەست لە گەشەپێدانی ئەپەکە هەڵدەگرێت و بە کۆتای دەهێنێت.

کۆمپانیای ئەدۆبی ڕایگەیاند لە ڕێکەوتی 9 ـی مانگی داهاتووەوە (4) ئەپی Adobe Shockwave ڕادەگیرێت و چیدیکە پشتگیری ئەپەکە ناکات و گەشەی پێنادات، هەروەها لە هەمان کاتدا بەردەستکردنی ئەپی Adobe Shockwave Player بۆ داگرتن لە ویندۆز ڕادەگرێت. کۆمپانیاکە لە پێشوودا و لە 2017 بەردەستکردنی ئەپی Adobe Shockwave Player ـی بۆ ئامێرەکانی ماک ڕاگرتبوو.

کۆمپانیاکە هۆکاری کۆتایی پێهێنانی ئەپەکەی ئاشکراکرد و ڕایگەیاند کە چوونی لێشاوی هاوڵاتیان بۆ سەر سەکۆی مۆبایل و پەیدابوونی HTML5 و WebGL لە گرنگترین هۆکارەکانی لەناوچوونی ئەپەکەن.

ئەگەر بەکارهێنەرێکی ئەپەکەیت، پێویستە لە ئێستاوە جێگرەوەیەکی بۆ بدۆزیتەوە، چونکە بەمنزیکانە کۆتایی پێدێت.

ماکوان بەرزان

نووسەری پێشکەوتوو، هەوادار و گەشەپێدەری سەکۆکانی ئەپڵ.