ئۆتۆمبێل

تێسلا ئۆتۆمبێلی کارەبایی Tesla Y ـی بە نرخی دەستپێکی 39.000$ ـەوە نمایشکرد

سەر لە بەیانی ئەمڕۆ کۆمپانیای تێسلای ئەمریکی بە ئامادەبوونی ئیڵۆن مەسک بەڕێوەبەری گشتی کۆمپانیاکە نوێترین ئۆتۆمبێلی کارەبایی بە ناوی Tesla Y ـەوە نمایشکرد، هاوکات کۆمپانیاکە لەگەڵ نمایشکردنیدا نرخ و کاتی بەردەست کردن و چەند تایبەتمەندییەکی لە ئۆتۆمبێلەکە ئاشکراکرد.

دوێنێ ئیڵۆن مەسک لەسەر سەکۆی نمایشکردنی ئۆتۆمبێلە نوێیەکەیان ئامادەبوو و ئۆتۆمبێلەکە کارەباییە نوێیەکەیانی نمایشکرد، ئۆتۆمبێلی Tesla Y لە جۆری SUV ـە و تەنها بە ڕێژەی 10٪ قەبارەی گەورەترە لە جۆری 3. ئۆتۆمبێلە نوێیەکەی تێسلا بە 4 جۆر بەردەست دەکرێت، ئەمانە توانا و نرخی جۆرەکانی ئۆتۆمبێلە کارەباییە نوێیەکەی تێسلان:

  • مەودا مامناوەند(Standard Range): توانای بڕین: 230 میل. بەرزترین خێرایی: 120 میل لە کاتژمێرێک. خێرایی لە 0 تا 60 میل: 5.9 چرکە. نرخ: 39.000$.
  • مەودا درێژ(Long Range): توانای بڕین: 300 میل. بەرزترین خێرایی: 130 میل لە کاتژمێرێک. خێرایی لە 0 تا 60 میل: 5.5 چرکە. نرخ: 47.000$.
  • دوو مەکینەی AWD: توانای بڕین: 280 میل. بەرزترین خێرایی: 135 میل لە کاتژمێرێک. خێرایی لە 0 تا 60 میل: 4.8 چرکە. نرخ: 51.000$.
  • کارامە(Performance): توانای بڕین: 280 میل. بەرزترین خێرایی: 150 میل لە کاتژمێرێک. خێرایی لە 0 تا 60 میل: 3.5 چرکە. نرخ: 60.000$.

ئۆتۆمبێلی Tesla Y جێگای 7 سەرنشینی دەبێت، هەروەها خاوەن ڕوونمایەکی 15 ئینج دەبێت لە ناوەوە. لەگەڵ ئەوەشدا خاوەن تایبەتمەندی خۆلێخوڕ (self-driving) ـیش دەبێت.

جۆرەکانی Long Range و دوو مەکینەی AWD و کارامەی تێسلا نوێیەکە پایزی ساڵی داهاتوو بەردەست دەکرێن، هەروەها جۆری Standard Range لە بەهاری ساڵی 2021 ـەدا بەردەست دەکرێت.

ئۆتۆمبێلی Tesla Y بووە پێنجەمین جۆری ئۆتۆمبێلی کارەبایی کۆمپانیای تێسلا لە ساتی دامەزراندییەوە تاوەکو ئێستا، هەروەها یەکەمین بەرهەمی ئەمساڵی کۆمپانیاکە بوو. کۆتا جۆر کە تێسلا نمایشی کردبوو ئۆتۆمبێلی کارەبایی Tesla 3 بوو لە ناوەندی ساڵی 2017 ـەدا بە نرخی دەستپێکی 35.000$ ـەوە.

سەرچاوە :

15 ئازار، 2019
ئاڤاتار
خوێندکاری پەیمانگای کۆمپیوتەرم، شارەزایی تەواوم هەیە لە هەریەک لە سیستەمە کارپێکەرەکانی iOS و macOS و Windows. ڕۆژانە و بە بەردەوامی ئاگاداری دواین هەواڵ و گۆڕانکارییەکانی تایبەت بە تەکنەلۆژیام. ئێستا، لە کەی ئای تی ئێن سەرقاڵی نووسینی بابەتی پەیوەندیدار بە تەکنەلۆژیاوەم. دەتوانیت کرتە لە وێنۆچکەی تۆڕە کۆمەڵایەتییەکان بکەیت ئەگەر خوازیاریت پەیوەندیم پێوە بکەیت یاخود ئاگات لە دواین چالاکییەکانم ببێت.
509