ئەپڵ ڕێکەوتی ئەنجامدانی کۆنگرەی تایبەت بە نمایشکردنی iPhone 11 و چەند بەرهەمێکی دیکەی خۆی ئاشکرا کرد

وا دیارە ئامادەکارییەکانی کۆمپانیای ئەپڵ بە کۆتا هاتوون بۆ ڕاگەیاندنی ئایفۆن و بەرهەمە نوێیەکانی دیکەی ئەمساڵی. هەر بۆیە کۆمپانیاکە ڕێکەوتی ئەنجامدانی کۆنگرەیەکی تایبەتی ئاشکرا کرد.

کۆمپانیای ئەپڵ ڕێکەوتی 10 ـی مانگی 9 ـی ئەمساڵی دیاریکرد بۆ ئەنجامدانی کۆنگرەیەکی تایبەت بە نمایشکردنی iPhone 11 و چەند بەرهەمێکی دیکەی خۆی لە ژێر ناوی “By innovation only : تەنها بە نوێگەری”. کۆنگرەکە لە شانۆی Steve Jobs لە بارەگای Apple Park لە شاری کۆپێرتینۆی ویلایەتی کالیفۆڕنیای ئەمریکا لە کاتژمێر 10:00 ـی سەر لە بەیانی بە کاتی ئەمریکا و کاتژمێر 8:00 ـی ئێوارە بە کاتی هەولێری پایتەختی کوردستان بەڕێوە دەچێت.

لە هەمان کاتدا، ئەپڵ بانگهێشتنامەی ڕەوانەی ڕۆژنامەنووسان و میدیاکاران کرد تاوەکو بەژداری لە کۆنگرەکەدا بکەن.

ئەو بەرهەمانەی کە پێشبینی دەکرێن لە کۆنگرەکەدا نمایش بکرێن:

• iPhone 11 و iPhone 11 Pro و iPhone 11XR.
• زنجیرەیەکی نوێ لە کاتژمێری زیرەکی Apple Watch.
• MacBook Pro 16-inch.
• چەند نەوەیەکی نوێ لە ئامێری iPad.
• دووبارە ناساندنەوەی خزمەتگوزارییەکانی +Apple TV و Apple Arcade و زیاتر.

کەی ئای تی ئێن بۆ کۆنگرەی تایبەتی ئەمجارەی ئەپڵیش لەگەڵتان دەبێت بۆ گواستنەوەی ڕووماڵی کۆنگرەکە بە زمانی شیرینی کوردی، لەگەڵمانبن بۆ زانینی نوێکارییەکانی تایبەت بە کۆنگرەکە!

ماکوان بەرزان

نووسەر و بەڕێوەبەری نووسین لە کەی ئای تی ئێن. گەشەپێدەری iOS، هەواداری  و خوێندکاری پەیمانگەی زانستی کۆمپیوتەر.