لە میانەی بەڕێوەچوونی کۆنگرەیەکی تایبەت لە لایەن ئەپڵەوە لە ئەمشەودا، کۆمپانیاکە ڕێکەوتی بەردەستکردن و نرخی بەژداریکردنی مانگانەی خزمەتگوزاری Apple Arcade ـی ئاشکراکرد.
لە سەرەتاکانی ئەمساڵدا، کۆمپانیای ئەپڵ خزمەتگوزاری Apple Arcade ـی تایبەت بە یاریکردن ڕاگەیاند، بەڵام ڕێکەوتی بەردەستکردن و نرخی نادیار بوون. ئەمشەو ئەپڵ ئاشکرای کرد کە خزمەتگوزاری Apple Arcade ـی تایبەت بە یاریکردن لە ڕێکەوتی 19 ـی ئەم مانگەدا بۆ سەرجەم بەکارهێنەرانی ئایفۆن و ئایپاد و ئەپڵ تیڤییەکان بەردەست دەکرێت. نرخی بەژداریکردن 4.99$ دەبێت بۆ هەر مانگێک.
خزمەتگوزاری Apple Arcade خاوەن زیاتر لە 100 یاری جۆراوجۆر دەبێت و یاری دەرهێڵ و سەرهێڵیش تێیدا بوونی دەبێت. ئەوەی ئەو خزمەتگوزارییە جیاواز دەر دەخات، ئەوەیە کە هیچ کام لە یارییەکانی نێوی لە خزمەتگوزاری دیکەدا بوونی نابێت. گرنگترین یارییەکانی نێو خزمەتگوزارییەکە Monument Valley و Alto’s Adventure و Final Fantasy و SimCity ـن.
هەروەها کۆمپانیاکە مانگێک بەژداربوونی بە خۆڕایی دەداتە بەکارهێنەران لە یەکەم بەژداربووندا.
