10
ئامێرە هەمەجۆرەکان 24, ئه‌یلول 2019 بۆچوون

شاومی تەلەفزیۆنی زیرەکی Mi TV Pro ـی بە 3 قەبارەی جیاواز و پشتگیر لە 8K و ڕوونمای پڕاوپڕەوە ڕاگەیاند

لە کۆنگرەیەکی تایبەتدا و لە پاڵ نمایشکردنی مۆبایلەکانی Mi 9 Pro 5G و Mi Mix Alpha و ڕووکاری MIUI 11 ـدا، کۆمپانیای شاومی تەلەفزیۆنی زیرەکی Mi TV Pro ـیشی بە 3 قەبارەی جیاواز و پشتگیر لە 8K و ڕوونمای پڕاوپڕەوە ڕاگەیاند.

تەلەفزیۆنە زیرەکە نوێیەکەی شاومی بە قەبارەکانی 43 و 55 و 65 ئینج بەردەست دەکرێت. خاوەن ڕوونمایەکە کە ڕێژەی 97% ـی پێشەوەی گرتۆتەوە، ڕوونمای تەلەفزیۆنە زیرەکەکەی شاومی پشتگیری لە ڕوونی تاوەکو 8K دەکات. لە لێوارە کەمەکەی خوارەوەیدا، وێنۆچکەی کۆمپانیای شاومی و نووسینی “Designed by Xiaomi” بوونیان هەن.

چوارچێوەی ڕوونمای تەلەفزیۆنە زیرەکە نوێیەکەی شاومی لە ماددەی ئەلەمنیۆم درووست کراوە و بەشی پشتەوەشی لە مادەی کاربۆن فایبەر درووست کراوە. تەلەفزیۆنە زیرەکە نوێیەکەی شاومی خاوەن پڕۆسێسەرێکە لە جۆری FinFET ـی 12 نانۆمەتری بە هەبوونی 4 یەکەی 64 بتی. هەروەها خاوەن ڕامێکە بە فراوانی 2 گێگابایت و بیرگەیەکی ناوەکی بە قەبارەی 32 گێگابایت.

تەلەفزیۆنە زیرەکە نوێیەکەی شاومی خاوەن بڵندگۆی جۆری Dolby Audio و یاریدەدەری دەنگی XiaoAi و فرمانەکانی دەنگە. بە شێوەیەکی بنەڕەتی خاوەن هەریەکە لە ئەپەکانی Tencent Video و Youku و VOD from iQiyi ـە.

نرخەکانی تەلەفزیۆنی زیرەکی Mi TV Pro:

  • قەبارەی 43 ئینج: 210$.
  • قەبارەی 55 ئینج: 337$.
  • قەبارەی 65 ئینج: 478$.

لە ئەمڕۆوە تەلەفزیۆنە زیرەکەکەی شاومی بەردەست دەبێت بۆ کڕین بە شێوەی پێشوەختە و لە ڕێکەوتی 27 ـی ئەم مانگەش لە بازاڕەکانی چین بەردەست دەکرێت. تاوەکو ئێستا شاومی ڕێکەوتی بەردەستکردنی تەلەفزیۆنەکەی لە بازاڕەکانی وڵاتانی دیکەی جیهان ئاشکرا نەکردووە.

سەرچاوە :
بۆچونی تۆ