سبەی یەکەمین کۆبوونەوەی گرووپی گەشەپێدەرانی گوگڵ لە هەولێر بەڕێوەدەچێت

دوای دووساڵ لە هەوڵدان بۆ دامەزراندنی، لە کۆتاییدا گروپی گەشەپێدەرانی گوگڵ لە هەولێر دامەزرا.

گروپی گەشەپێدەرانی گوگڵ (GDG) گروپێکی جیهانییە و لە بەشێکی شارەکان و لە ٩٥ وڵاتدا لقی تایبەت بە خۆی هەیە و بەشێوەیەکی ڕاستەوخۆ لە لایەن خودی کۆمپانیای گوگڵەوە ڕێنمایی دەکرێت.

گرووپی گەشەپێدەرانی گوگڵ لە هەولێر (GDG Erbil) بە گشتی پێک دێت لەو پڕۆگرامسازانەی کە ئارەزووی فێربوونی تەکنەلۆژیا نوێیەکانی جیهان دەکەن و ئامادەن کەسانی تر فێر بکەن، گرووپەکەش مانگی جارێک یان دوو جار کۆدەبێتەوە.

شایەنی باسە گروپەکە سەربەخۆیە و لەلایەن کۆمەڵێکەوە بەڕێوەدەبرێت کە خولیای تەکنەلۆژیای سەردەمن، چالاکی و ڕا و بۆچوونەکانی ئەم گروپە بە هیچ جۆرێک پەیوەند نییە بە کۆمپانیای گووگڵەوە.

وا بڕیاریشە سبەی پێنجشەممە (١٠/٣) گروپەکە یەکەمین کۆبوونەوەی خۆی ئەنجام بدات لە شاری هەولێر و لە زانکۆی کوردستان، کۆبوونەوەکە کاتژمێر ٥:٣٠ ی ئێوارە دەستپێدەکات و بۆ ماوەی ٢ کاتژمێر بەردەوام دەبێت.

کۆبوونەوەکەش لە دوو بەش پێکدێت:

بەشی یەکەم: دەربارەیەک لەسەر گروپەکە و باسکردنی ئامانج و هۆکاری دروستبوونی ئەم گروپە.

بەشی دووەم: وانەیەک پێشکەش دەکرێت لەژێر ناونیشانی “دەربارەیەک لەسەر دروستکردنی ئێکستێنشنی گووگڵ کرۆم” کە لە لایەن ” ئارام سەلیم “ دەوترێتەوە کە شارەزاییەکی باشی هەیە لەم بوارەدا.

لە ئێستادا جێگا بۆ بەشداری کردن لە کۆبوونەوەی یەکەم نەماوە و وەرگرتنی فۆڕم داخراوە.

ئەنەس هاوار

هەوڵدەدەم بۆ باشترکردنی ڕەوشی تەکنەلۆژیا لەکوردستان و هۆشیارکردنەوەی خەڵکیی لەڕێگەی هەواڵ و زانیاری تەکنەلۆژیی.