بابەتی گرینگ 24, ئازار 2017

زانیاری نوێ لەسەر گالاکسی نۆوت ٨ بڵاودەبێتەوە!

نزیک دەبینەوە لەکۆنگرەی (Unpacked 2017) ی کۆمپانیای سامسۆنگ، کە تیایدا نەوەی نوێی زنجیرەی گالاکسی ئێس نمایش دەکرێت و ڕۆژ لەدوای ڕۆژ پێشبینی و زانیاری دزەپێکراوی زیاتر بڵاودەکرێنەوە. لەئێستاشدا، بەهۆی شکستهێنانی مۆبایلی گالاکسی نۆوت ٧ بەهۆی پاتری و کێشەی گەورەوە، پێگە تەکنەلۆژییەکان چاویان لەڕاگەیاندنی نەوەیەکی نوێی زنجیرەی گالاکسی نۆوتە بەناوی گالاکسی نۆوت ٨ شان بەشانی ئێس ٨.

دوێنێ پێگەی (Phone Arena) نوێترین زانیاری پێشبینیکراوی لەسەر نەوەی نوێی نۆوت بڵاوکردەوە کە گالاکسی نۆوت ٨ ـە، لەسەر بنەمای وتەی بەرپرسی بەشی مۆبایلی کۆمپانیای سامسۆنگ (Dj Koh) کە دەڵێت: “من مۆبایلێکی باشتر، پارێزراوتر و نوێکارانەتر بەرهەم دەهێنم کە نۆوت ٨ ـە”، ئەم وتەیەی دی جەی، هیوایەکی زۆری بەهەوادارانی سامسۆنگ بەخشی، لەڕۆشنایی وتەکەشەوە پێگە تەکنەلۆژییەکان چاوەڕێی تایبەتمەندی نایاب لە نۆوت ٨ دەکەن.

پێگەکە سوودی لەچەند سەرچاوەیەکی چینی وەرگرتووە بۆ زانیارییە دزەپێکراوەکان و ئاماژەی بەتایبەتمەندییەکانی نۆوت ٨ داوە، لەخوارەوەدا باس لە سەرجەم زانیارییە دزەپێکراوەکان دەکەین کە لەسەر نۆوت ٨ بڵاوکراونەتەوە.

  • پڕۆسێسەر

بەگوێرەی پێشبینی و دزەپێکراوەکان، مۆبایلی گالاکسی نۆوت ٨ خاوەنی پێشکەوتووترین پڕۆسێسەر دەبێت کە بریتیین لە سناپدڕاگۆن ٨٣٥ یاخود زنجیرەی نۆیەمی Exynos. هەروەکو ساڵانی پێشوو، لەوڵاتی ئەمریکادا نۆوت ٨ لەجۆری پڕۆسێسەری سناپدراگۆن دەفرۆشرێت، بەڵام لەوڵاتانی تر بەگشتی نۆوت ٨ ی جۆری Exynos دەفرۆشرێت، لەگەڵ ئەوەی تا ئێستا نەوەی نۆیەمی پڕۆسێسەرەکانی Exynos ڕانەگەیەنراوە، بەڵام پێشبینی دەکرێت نۆوت ٨ ببێتە سەرەتایەک بۆ ڕاگەیاندنی و خاوەنی زنجیرەی نۆیەمی ئەو پڕۆسێسەرە بێت، کە لەهەموو زنجیرەکانی تر پێشکەوتووتر دەبێت.

  • ڕوونما

ئەوەی کە بەکارهێنەرانی سامسۆنگ چاوەڕێیان دەکرد، پێشبینی دەکرێت لێرەدا بێتە دی. بەگوێرەی زانیارییە دزەپێکراوەکان، گالاکسی نۆوت ٨ قەبارەی شاشەکەی ٦.٤ ئینچ دەبێت، لەجۆری Super AMOLED، بەڵام ئەوەی کە سەرنجڕاکێش و نایاب دەبێت، ڕوونیەکەیەتی کە پێشبینی دەکرێت ڕوونی ڕوونماکەی 4K بێت، واتا ٣٨٤٠ بە ٢١٦٠ پیکسڵ.

  • ڕام و بیرگە

پێشبینی دەکرێت ڕامی مۆبایلەکە (٦ گێگابایت) بێت، ئەمەش باوەڕپێکراوە، چونکە کۆتاییەکانی ساڵی پار سامسۆنگ مۆبایلی (C9 Pro) ی بەڕامی ٦ گێگابایتەوە ڕاگەیاند و لەفرۆشگاکانی وڵاتی چین بەردەستی کرد، هەروەکو پێشبینیش دەکرێت کە ڕامی گالاکسی ئێس هەشتیش بەهەمان شێوە ٦ گێگابایت بێت. سەبارەت بە بیرگەی ناوەکی مۆبایلەکە، زانیاری ورد لەسەری نین، بەڵام دەگوترێت کە بیرگەکەی تا ٢٥٦ گێگابایت دەبێت.

هەروەکو ئاماژەمان پێدا، ئەمانە تەنها پێشبینیکراون و زانیاری فەرمی نین، دەبێت چاوەڕوانی سامسۆنگ بین تا ئەو کاتەی کە مۆبایلەکە ڕادەگەیەنێت، بزانین ئەم جارە چی بۆ ئامادەکردووین بۆ ئەوەی ئازاری نۆوت حەوتمان بیربباتەوە!

سەرچاوە :
بۆچونی تۆ