هەواڵ 9, كانونی یه‌كه‌م 2018

کوالکۆم پڕۆسێسەری Snapdragon 8cxـی تایبەت بە کۆمپیوتەرەکانی Windows 10 ڕاگەیاند

لە کۆنگرەی ساڵانەی Snapdragon Tech Summit کە ئەنجام دەدرێت لە دورگەی هاوای، کۆمپانیای کوالکۆم بە فەرمی هەستا بە ئاشکرا کردنی پڕۆسێسەرێکی نوێ بۆ کۆمپیوتەرەکانی Windows 10 بە ناوی Snapdragon 8cx، پڕۆسێسەرە نوێیەکەش وەک جێگرەوەیەک دەبێت بۆ Snapdragon 850 بەڵام بە چەندین گۆڕانکاریەوە، پڕۆسێسەری Snapdragon 850 تەنها جۆرێکی دەستکاری کراو بوو لە پڕۆسێسەری Snapdragon 845 بەڵام پڕۆسێسەرە نوێیەکە بە یەکەم پڕۆسێسەری تایبەت کراو دادەنرێت بۆ ئامێرەکانی کۆمپیوتەری Windows 10 و بەرهەمهێنراوە لە ڕێگای تەکنەلۆژیای 7 نانۆمەتریەوە و بڕیارە بەکاربهێنرێت لە کۆمپیوتەرە فرۆشراوەکانی چارەکی سێیەمی ساڵی داهاتوو.

لە بارەی پڕۆسێسەرەکەوە کوالکۆم دەڵێت توانای پێشکەشکردنی چەند ئەوەندەی ئاستی Snapdragon 850ـی هەیە لەگەڵ ئەوەشدا ناوبراو ئاماژەی بەوەدا لە حاڵەتی کارپێکردنی نەرمەکاڵاکانی Windows ARMـدا پڕۆسێسەرە نوێیەکە توانای پێشبڕکێکردنی پڕۆسێسەرەکانی Intel Core i5 U-Seriesـی کۆمپانیای Intelـی هەیە، پێشووتر پڕۆسێسەری Snapdragon 850 توانی سەربکەوێت بەسەر پڕۆسێسەری Intel Core i5-6300U لە تاقیکردنەوەی فرە ناوکدا بەڵام کەمێک دواکەوت لە تاقیکردنەوەی تاک ناوکدا هەر بۆیەش ئاشکرایە پڕۆسێسەری Snapdragon 8cx توانای پێشبڕکێکردنی لەگەڵ نەوەی هەشتەمی ئێستای پڕۆسێسەری Intel Core i5ـدا هەیە.

هەروەها پڕۆسێسەری نوێی گرافیکی Adreno 680 لە Snapdragon 8cxـدا توانای مامەڵەکردنی دەبێت لەگەڵ ڕوونماکانی 4K HDR لەگەڵ ئەوەشدا توانای کارپێکردنی ڤیدیۆکانی 4K HDR هەیە بە ڕێژەی 120 FPS بۆ هەر چرکەیەک، سەبارەت بە جۆری ناوکە بەکارهێنراوەکان لەم پڕۆسێسەرە نوێیە ئەوا لە جۆری Kryo 495ـە و مۆدێمی Qualcomm X24ـیش لە خۆدەگرێت کە توانای داگرتنی دەگاتە 2Gbps و توانای بەرزکردنەوەشی دەگاتە 316Mbps، سەرەڕای ئەمانەش پڕۆسێسەری Snapdragon 8cx پشتگیری لە نەوەی سێیەمی PCI-E و نەوەی دووەمی USB 3.1 دەکات و Hexagon 685 DSPـیش یاریدەدەر دەبێت لە باشتر کارکردنی هەریەک لە یاریدەدەرە ئەلیکترۆنیەکانی کۆرتانا و ئەلێکسا.

سەبارەت بە تایبەتمەندیەکانی دیکەی ئەوا پشتگیری لە بلوتوس 5.0 و بارگاویکەرەوەی خێرای +Quick Charge 4 دەکات، هەر بۆیەش بێگومان پڕۆسێسەری Snapdragon 8cx خێراترین پڕۆسێسەری بەرهەمهێنراوی کۆمپانیای کوالکۆمە و گرنگترین بەشە لە کۆمپیوتەرەکانی Windows 10ـدا لەگەڵ ئەوەش بە دڵنیایەوە ئەم پڕۆسێسەرە یاریدەدەرێکی زۆر باش دەبێت لە باشتر کردنی تەمەنی پاتری و بەرگەگرتنی بۆ ماوەیەکی زیاتر، شایەنی باسیشە پڕۆسێسەرەکە توانیویەتی بڕوانامەی Windows 10 Entreprise بەدەست بهێنێت، لە بارەی ناوە سەیرەکەی پڕۆسێسەرەکە کە cxـە پیتی C بە کورتکراوەی وشەی Compute دادەنرێت و پیتی Xـش کورتکراوەی وشەی Extremeـە.

تاگەکان Snapdragon 8cx
بۆچونی تۆ