شاومی

شاومی لە ڤیدیۆیەکی نوێدا ئاشکرای دەکات مەودای کارکردنی پەنجەمۆری ژێر ڕوونمای زیاتر فراوان کردووە

بە دڵنیایەوە هەستەوەری پەنجەمۆری ژێر ڕوونما لە زۆرینەی مۆبایلەکانی داهاتوودا بەردەست دەکرێت و زۆرێک لە کۆمپانیاکانی دروستکەری مۆبایلیش لە هەوڵی ئەوەدان ئەم تەکنیکە زیاتر گەشەپێبدەن، لەم نێوەندەشدا کۆمپانیای شاومی یەکێکە لەو کۆمپانیایانە، لەم بارەیەوە لە ماوەی ڕابردوودا ڤیدیۆیەک لە تۆڕی Weiboـدا بڵاوکرابوویەوە تێیدا کۆمپانیای شاومی هەڵدەستێت بە پیشاندانی تەکنیکی هەستەوەری پەنجەمۆری ژێر ڕوونما بە خێراییەکی زیاتر لەگەڵ کارکردنی لە ناوچەیەکی فراوانتردا.

ئاشکرایە ئەو هەستەوەری پەنجەمۆرەی لە ڕوونمای مۆبایلەکانی ئێستادا بەکاردێت تاڕادەیەک خێرایی کەمە و پێویستە بەکارهێنەریش پەنجەی لە شوێنێکی دیاریکراودا جێگیر بکات هەتاوەکو مۆبایلەکە بیناسێتەوە، بەڵام وا دیارە شاومی گۆڕانکاریەکی گەورە ئەنجام دەدات لەم تەکنیکە ئەمەش Lin Bin لە هەژماری کۆمپانیا لە تۆڕی Weibo ئاشکرایکردووە تەکنیکەکە لە لایەن شاومیەوە گەشەپێدەدرێت و چەند چرکەیەکی کەمیشی پێویست دەبێت هەتاوەکو پەنجەی بەکارهێنەر بناسێتەوە.

لەگەڵ زیادکردنی خێرایشدا وا دیارە ئەم تەکنیکەی شاومی بەردەست دەکرێت لە ناوچەیەکی فراوانتری ڕوونماکە ئەویش بەلایەنی کەمەوە هەتاوەکو ناوەڕاستی ڕوونماکە دەبێت، بەڵام هەتاوەکو ئێستا زانیاری زیاتر نییە لە بارەی پارێزراوتر بوونی تەکنیکەکە هەر بۆیە چاوەڕوان دەبین هەتاوەکو کۆمپانیای شاومی لە داهاتوویەکی نزیکدا زانیاری زیاتر ئاشکرا بکات.

20 كانونی دووه‌م، 2019
ئاڤاتار
ناوم هاوژین یونسە، وەک نووسەرێک لە ماڵپەڕی کەی ئای تی ئێندا کاردەکەم و هەندێک شارەزاییم هەیە لە سیستمەکانی ئەندرۆید و ئای ئۆ ئێس و ویندۆز و ئاگاداری نوێترین هەواڵە تەکنەلۆژییەکانم، ئامانجم پێشخستنی بواری تەکنەلۆژیایە لە کۆمەڵگای کوردیدا و ناساندنی زیاتری تەکنەلۆژیایە بە هەر تاکێکی کورد.
598