سامسۆنگ نەوەیەکی نوێی لە تابلێتی گالەکسی Tab A ڕاگەیاند

لە دوای ئەوەی لە چەند ڕۆژی ڕابردوودا کۆمپانیای سامسۆنگ تابلێتی گالەکسی Tab S5e ـی ڕاگەیاند، دوا بە دوای ئەوە کۆمپانیاکە نەوەیەکی نوێی لە تابلێتی گالەکسی Tab A ـیش ڕاگەیاند.

نەوە نوێیەکەی تابلێتی گالەکسی Tab A تایبەتمەندی کەمترە لە چاو تابلێتی گالەکسی Tab S5e و نرخیشی کەمترە. تابلێتەکە خاوەن ڕوونمایەکە بە قەبارەی 10.1 ئینج و بە وردی نیشاندانی 1920 بە 1200 پێکسڵ. لە پشتەوە خاوەن کامێرایەکە بە ڕوونی 8 مێگاپێکسڵ و کامێرایەک لە پێشەوە(سێڵفی) بە ڕوونی 5 مێگاپێکسڵ. خاوەن پڕۆسێسەری جۆری Exynos 7904 SoC ـە، هەروەها خاوەن ڕامێکە بە فراوانی 3 و بیرگەیەکی ناوەکی بە قەبارەی 32 گێگابایت (زیادکردن لە ڕێگای microSD بۆ 400 گێگابایت) و پاترییەک بە توانستی 6.150 ملی ئەمپێر/کاتژمێر. تابلێتەکە خاوەن 2 بڵندگۆی بەهێزە لە جۆری Dolby Atmos و پشتگیری لە کیبۆردی دەرەکی دەکات.

تابلێتەکە بە هەردوو بژاردەی بە تەنها وایفای و بە سیمکارت و بە ڕەنگەکانی ڕەش و ئاڵتونی و زیوی بەردەست دەبێت. نرخی لە 237$ ـەوە دەست پێدەکات تاوەکو 305$ و لە ڕێکەوتی 5 ـی مانگی 4 ـەوە لە وڵاتی ئەڵمانیا دەست دەکرێت بە فرۆشتنی، لە پاشان ڕەوانەی بازاڕەکانی دیکەی جیهان دەکرێت.

ماکوان بەرزان

نووسەر و بەڕێوەبەری نووسین لە کەی ئای تی ئێن. گەشەپێدەری iOS، هەواداری  و خوێندکاری پەیمانگەی زانستی کۆمپیوتەر.