ئەپڵ وەشانەکانی iOS 12.3 و tvOS 12.3 ـی بە خاوەن ئەپی نوێکراوەی TV ـییەوە بەردەستکرد

لە دوای تێپەڕبوونی حەوت هەفتە بەسەر بەردەستکردنی وەشانەکانی iOS 12.2 و tvOS 12.2. ئەمڕۆ ئەپڵ هەر یەکە لە وەشانە نوێیەکانی iOS 12.3 و tvOS 12.3 ـی بۆ سەرجەم بەکارهێنەرانی ئامێرەکانی ئایفۆن و ئایپاد و ئایپۆد و ئەپڵ تیڤییەکان بەردەستکرد. بێگومان ئەم وەشانەش خۆی لە چەند گۆڕانکارییەک دەبینێتەوە. دیارترین گۆڕانکاری، نوێکردنەوەی ئەپی TV ـییە.

لە مانگی 3 ـی ئەمساڵدا و لە کۆنگرەیەکی تایبەتدا لە ژێر ناوی It’s show time، ئەپڵ نوێکردنەوەی ئەپی TV ـی لە وەشانەکانی iOS و tvOS ـدا ڕاگەیاند. ئێستا ئەپەکە خاوەن دیزاینێکی نوێیە، ڕێگەت پێ دەدات گشت فیلم و دراماکان ڕاستەوخۆ سەیر بکەیت، لەگەڵ نیشاندانی گشت وردەکارییەکانی. کە لە پێشوودا بە گرتە کردن لە فیلم و دراماکان، ئەپی تایبەت بە کۆمپانیای بەرهەمهێنەری بۆ دەکردیتەوە. هەروەها دەتوانرێت فیلم و دراماکان ڕاستەوخۆ لە نێو ئەپەکەدا بکڕدرێن.

دەربارەی گۆڕانکارییەکانی دیکەی وەشانی iOS 12.3، پشتگیری نەوەی دووەمی پەخشکەری بێوایەری AirPlay 2 بۆ تەلەفزیۆنەکان زیاد کراوە کە دەتوانرێت وێنە و ڤیدیۆکان پەخش بکرێن بۆ سەر تەلەفزیۆنە زیرەکەکان. هەروەها چەند وردە کێشەیەکی خزمەتگوزاری +News و ئەپی Music و پەیوەندیکردنی Wi-Fi و ئەپی Apple TV Remote چارەسەر کراوە.

چۆنیەتی نوێکردنەوەی وەشان:

• کردنەوەی ئەپی Settings
• کردنەوەی بەشی General
• کردنەوەی بەشی Software Update
• کرتە کردن لە Download and install

تێبینی بۆ نوێکردنەوەی وەشان:

• پێویستە وزەی پاتری ئامێرەکەت لە %50 زیاتر بێت.
• پێویستت بە ئینتەرنێتی وایفای هەیە بۆ نوێکردنەوەی وەشان.

• ئەپڵ ئەپی Apple TV ـی بە تایبەتمەندی زیاتر و ڕووکاری نوێوە نوێکردەوە

ماکوان بەرزان

نووسەر و بەڕێوەبەری نووسین لە کەی ئای تی ئێن. گەشەپێدەری iOS، هەواداری  و خوێندکاری پەیمانگەی زانستی کۆمپیوتەر.