سامسۆنگ نموونەیەکی نوێی مۆبایلی چەماوەی داهاتوویانی بڵاوکردەوە

تەنها چەند مانگێک دەبێت سامسۆنگ مۆبایلی چەماوەیی Galaxy Fold ـی نمایش کردووە و بەردەستی کردووە. بەڵام وا دیارە کۆمپانیاکە کار لەسەر مۆبایلێکی چەماوەیی نوێ و جیاواز دەکات.

لە میانەی کۆنگرەی گەشەپێدانی سامسۆنگ (Samsung Developer Conference) لە 2 ڕۆژی ڕابردوودا، کۆمپانیای سامسۆنگ ڤیدیۆیەکی بڵاوکردەوە کە بریتییە لە نموونەیەکی نوێ مۆبایلی چەماوەیی داهاتوویان و لە کۆنگرەکەدا باسی لێ کرد. لە ڤیدیۆکەدا دەردەکەوێت مۆبایلی چەماوەی داهاتووی سامسۆنگ توانای دەبێت بە ڕووی پێشەوەدا بچەمێندرێتەوە نەوەک وەکو Galaxy Fold بە شێوەی پەپولەیی و لە لایەکانەوە بچەمێندرێتەوە. هەروەها لە پێشەوە خاوەن دیزاینێکی هاوشێوەی مۆبایلی Galaxy Note 10 دەبێت.

سامسۆنگ دەڵێت ئەم مۆبایلە چەماوەییە نوێیە یارمەتیدەر دەبێت بۆ ئاسان هەڵگرتن لە گیرفاندا و شێوازی بەکارهێنانی مۆبایلە زیرەکەکان بۆ شێوازێکی نوێ دەگۆڕێت.

سامسۆنگ کاتێکی زۆری بەفیڕۆ نەدا بە باسکردنی وردەکارییەکانی مۆبایلە چەماوەییە نوێیەکە، وە ڕاشینەگەیاند کە چ کاتێک ئەم مۆبایلە چەماوەییە لە لایەن سامسۆنگەوە بەردەست دەکرێت. هەروەها هیچ ئاماژەیەکیشی بەوە نەدا کە ئایا ئەمە دیزاینێکی نوێی مۆبایلی چەماوەیی Galaxy Fold دەبێت یاخود نا.

لە ئێستادا کۆمپانیای سامسۆنگ بە شێوەیەکی چڕ کار لەسەر ڕووکاری One UI ـی بنچینەکراو لەسەر Android دەکات بۆ ئامێرەکانی و دەیەوێت زۆرترین گونجاندن بۆ مۆبایلە چەماوەییەکان درووست بکات.

ماکوان بەرزان

نووسەری پێشکەوتوو لە Kitn لە ٢٠١٨ ـەوە. ئەندازیاری iOS لە Gateway. خوێندکاری ئەندازیاریی ئایتی لە زانکۆی پۆلیتەکنیکی سلێمانی.