مۆبایلی Sony Xperia 1 II بە 4 کامێرا و پڕۆسێسەری Snapdragon 865 و پشتگیری لە 5G ـەوە ڕاگەیاندرا

لە دوای ڕەتکردنەوەی کۆنگرەی جیهانی مۆبایل (Mobile World Congress) و بەڕێوەنەچوونی لە ئەمساڵدا بە هۆی ڤایرۆسی کۆرۆناوە، کۆمپانیای Sony ناچاربوو مۆبایلە نوێیەکانی بە شێوەی سەرهێڵی نمایش بکات. کۆمپانیاکە مۆبایلی ئاست بەرزی Sony Xperia 1 II ـی بە 4 کامێرا و پڕۆسێسەری Snapdragon 865 و پشتگیری لە 5G ـەوە ڕاگەیاند، ئەمەش لە دوای ساڵێک لە ڕاگەیاندنی مۆبایلی سەرکەوتووی Sony Xperia 1.

لە مۆبایلە نوێیەکەدا، Sony جەختی لەسەر کامێرا و بواری چرکاندنی وێنە کردۆتەوە، هەروەها بووە یەکەمین مۆبایلی Sony کە پشتگیری لە نەوەی پێنجەمی پەیوەندی 5G بکات.

مۆبایلی Sony Xperia 1 II خاوەن ڕوونمایەکە بە قەبارەی 6.5 ئینج لە جۆری OLED و بە ڕوونی 4K و چێوەی سینەمایی 21:9 و خێرایی 90 هێرتز. لە پشتەوە، خاوەن 4 دانە کامێرای ئاست بەرزە بە ڕوونییەکانی 12 و 0.3 مێگاپێکسڵ، کە بە هاوکاری کۆمپانیای ZEISS درووست کراون. لە پێشەوەش خاوەن تاکە کامێرایەکە بە ڕوونی 8 مێگاپێکسڵ.

مۆبایلەکە لە ناوەوە خاوەن پڕۆسێسەری Snapdragon 865 و ڕامی 8 گێگابایت و بیرگەی 256 گێگابایت و پاترییەکە بە توانستی 4,000 ملی ئەمپێر. خاوەن هەستەوەری پەنجەمۆرە لە لاتەنیشتەوە و وەشانی Android 10 ـی لەسەر جێگیرە. ڕایەڵەی مۆبایلەکە توانای دەبێت پەیوەستی ڕایەڵەکانی تاوەکو sub-6GHz ببێت، هەروەها بژاردەی 4G ـیشی لێ بەردەست دەبێت، لە پاڵ 5G ـییەوە.

مۆبایلەکە خاوەن بڕوانامەی IP65 و IP68 ـە بۆ بەرگریکردن لە بەرانبەر ئاو و تۆزدا. بڵندگۆیەکانی باشتر کراون و خاوەن دەرچەی بیستۆکیشە.

 گرنگترین تایبەتمەندییەکانی مۆبایلی Sony Xperia 1 II:

• ڕوونما: قەبارە: 6.5 ئینج. جۆر: OLED. وردی نیشاندان: 1644 بە 3840 پێکسڵ. خێرایی: 90 هێرتز.
• دیزاین: نۆچ: هەیە. چاڵی ژێر ڕوونما: نییە.
• پڕۆسێسەر: (+Qualcomm SM8250 Snapdragon 865 (7 nm.
  
• گرافیک: Adreno 650.
• مۆدیەم: Qualcomm X55
• ڕام: 8 گێگابایت.
• بیرگە: 256 گێگابایت.
• ئەستووری: 7.6 میلیمەتر.
• کێش: 181.4 گرام.
• پاتری: 4,000 ملی ئەمپێر/کاتژمێر.
• بارگاویکردنەوە: پشتگیری لە بارگاویکردنەوەی خێرا.
• کامێرای پشتەوە: سەرەکی: 12 مێگاپێکسڵ بە تیرەی f/1.7 و لە جۆری Wide. دووەم: 12 مێگاپێکسڵ بە تیرەی f/2.4 و لە جۆری Telephoto. سێیەم: 12 مێگاپێکسڵ بە تیرەی f/2.2 و لە جۆری macro. چوارەم: 0.3 مێگاپێکسڵ لە جۆری هەستەوەری قوڵی (TOF 3D).
• کامێرای پێشەوە(سێڵفی): سەرەکی: 8 مێگاپێکسڵ بە تیرەی f/2.0 لە جۆری Wide.
• هەستەوەری ئاسایشی: هەستەوەری پەنجەمۆر لە لاتەنیشت.
• دەرچە: USB-C – بیستۆک.
• ڕایەڵە: 5G – Wi-Fi 802.11 a/b/g/n/ac – dual-band – Wi-Fi Direct – hotspot – Bluetooth 5.0. تایبەتمەندی NFC: هەیە. تایبەتمەندی Radio: نییە.
• سیمکارت: دووانە سیمکارت.
• ڕەنگ: ڕەش – پەمەیی.
• سیستەمی کارپێکەر: Android 10.
• حاڵەتی بەردەستبوون: بەردەست نییە.
• نرخ: نەزاندراو.

نرخ و ڕێکەوتی بەردەستکردنی مۆبایلەکە بە دیاریکراوی نەزاندراوە، بەڵام لە کۆتاییەکانی بەهاری ئەمساڵدا بەردەست دەکرێت و پێشبینی دەکرێت نرخی لە سەروو 1200 یۆرۆوە بێت.

ماکوان بەرزان

نووسەری پێشکەوتوو لە Kitn لە ٢٠١٨ ـەوە. ئەندازیاری iOS لە Gateway. خوێندکاری ئەندازیاریی ئایتی لە زانکۆی پۆلیتەکنیکی سلێمانی.