تەواوی تایبەتمەندییەکانی مۆبایلی Asus ZenFone 11 Ultra دزەی پێکرا

کۆمپانیای ئەیسووس ماوەی چەند ساڵێکە یەکێکە لە کۆمپانیا زۆر چالاکەکان لە بواری مۆبایلدا بە بوونی زنجیرەی ZenFone، کە ئاست بەرزە و قەبارەی بچووکە، هەروەها ROG Phone کە تایبەتە بە گەیمینگ و قەبارەی گەورەیە. زنجیرەی ZenFone 11 چاوەڕوان دەگرێت بەم زووانە نمایش بکرێت، هەروەها لەوانەیە بۆ یەکەمین جار بژاردەی قەبارە گەورە دیدەنی بکەین لە زنجیرەکە.

بەکارهێنەرێک لە تۆڕی ڕێددێت، تایبەتمەندیی و ڕێندەر و دیزاینی پاکەتی مۆبایلی ZenFone 11 Ultra بڵاو کردۆتەوە. هەروەکو ناوەکەی، مۆبایلەکە بژاردەیەکی گەورەتری مۆبایلی ZenFone 11 دەبێت و دیزاینی زیاتر لە مۆبایلی ROG Phone 8 Pro نزیک دەبێت. بە پێی زانیارییە دزە پێکراوەکان بێت، مۆبایلەکە زۆربەی تایبەتمەندییەکانی بە هەمان شێوەی ROG phone 8 Pro دەبێت، جگە لە تێکڕایی نوێ بوونەوەی ڕوونماکەی کە 144 هێرتزە، بەراورد بە مۆبایلی ROG Phone 8 Pro کە 165 هێرتزە.

چیپسێتی Snapdragon 8 Gen 3 لەسەر جێگیر دەکرێت و بیرگەی لە جۆری UFS 4.0 و ڕامی لە جۆری LPDDR5Xـە. ڕوونماکەی قەبارەی 6.78 ئینج. دەبێت و لە جۆری AMOLED و بە پانێڵی LTPO و ڕوونی +FHD. کامێرای سێڵفی ڕوونی 32 مێگاپێکسڵە و کامێرای سەرەکی ڕوونی 50 مێگاپێکسڵە بە هەستەوەری IMX890 و کامێرای تێلەفۆتۆ بە ڕوونی 32 مێگاپێکسڵ کە توانای 3 هێندە نزیککردنەوەی جۆری ئۆپتیکاڵی دەبێت و هەروەها کامێرای گۆشەفراوان بە ڕوونی 13 مێگاپێکسڵ.
پاترییەکەی قەبارەی 5,500 مللی ئەمپێر / کاتژمێری دەبێت بە بارگاوی کەرەوەی 65 وات و بارگاوی کەرەوەی 15 واتی بێ تەل.

موحەمەد نەجات

نوسەری پێشکەوتوو لە ماڵپەڕی کەی ئای تی ئێن، دەرچووی بەشی سیستەمی زانیاری کارگێڕی.