گووگڵ وەشانێکی تایبەت لە وێبگەڕی گووگڵ کرۆم بۆ ئەو کۆمپیوتەرانەی بە چیپسێتی کواڵکۆم کار دەکەن بەردەست دەکات

گووگڵ بە فەرمی ڕایگەیاند وەشانێکی نوێ لە وێبگەڕی گووگڵ کرۆم بۆ ئەو کۆمپیوتەرانەی کە بە پرۆسێسەری کواڵکۆم سناپدراگۆن کار دەکەن بەردەست دەکات. هەردوو کۆمپانیاکە دەڵێن کە ئەم وەشانە لە ڕووی کاراییەوە زۆر باشتر کراوە و لەمڕۆوە بەردەستە بۆ دابەزاندن. هەرچەندە لە ئێستادا کۆمپیوتەری ویندۆز هەیە کە کار بە چیپسێتی کواڵکۆم سناپدراگۆن دەکات، بەڵام ئامانجی سەرەکی ئەم ڕاگەیاندنە چیپسێتی Snapdragon X Elite ـە کە لە ناوەڕاستی ئەمساڵ بۆ یەکەمین جار لەسەر کۆمپیوتەرەکان جێگیر دەکرێت (ئەگەر لە ئێستادا کۆمپیوتەرێکت هەیە کە کار بە پرۆسێسەری کواڵکۆم سناپدراگۆن دەکات، دەتوانیت وەشانەکە تاقی بکەیتەوە. بۆ داونڵۆد کردن کرتە لێرە بکە.)

کواڵکۆم پێشووتر بانگەشەی ئەوەی کرد کە ئەم پرۆسێسەرە نوێیەیان لە ڕووی CPU نزیکەی دوو هێندە خێراترە لە پرۆسێسەری Core i7-1360P و i7-1355U لە کاتێکدا %68 وزە کەمتر بەکار دەبات. هەروەها کواڵکۆم دەڵێت تەواوی یارییەکانی ویندۆز لەسەر ئەم پرۆسێسەرە کار دەکات هەرچەندە بە ARM دیزاین کراوە و پێویست ناکات درووستکەرانی یارییەکە هیچ کۆدێک بگۆڕن بۆ گونجاندن لەگەڵ ئەم چیپسێتە.

میران ئەبوبەکر

بەڕێوبەری نووسین لە پێگە و ماڵپەڕی کەی ئای تی ئێن، خوێندکاری کۆلێژی پزیشکی دەرمانسازی.