بۆ یەکەمجار توانرا سیستەمی Windows 10X لەسەر ئامێرەکانی MacBook و Surface Go جێگیر بکرێت

لە کۆتاییەکانی ساڵی ڕابردوودا، کۆمپانیای مایکرۆسۆفت سیستەمی Windows 10X ـی تایبەت بە کۆمپیوتەر و تابلێتە دووانە ڕوونماکان ڕاگەیاند، هێشتا سیستەمەکە بەردەست نەکراوە و وا بڕیارە لە کۆتاییەکانی ئەمساڵدا بەردەست بکرێت. بەڵام بەر لە بەردەستکردنی، گەشەپێدەران توانییان لەسەر ژمارەیەک ئامێر دایبمەزرێنن.

گەشەپێدەرێک لە تویتەر ڕایگەیاند کە سەرکەوتوو بوو لە جێگیرکردنی سیستەمی Windows 10X لەسەر MacBook ـی 12 ئینج. هەروەها ڤیدیۆیەکیشی بڵاوکردۆتەوە و تێیدا جوڵەکانی سیستەمەکەی ڕوون کردووەتەوە. لە کاتێکدا کە سیستەمەکە تایبەتە بە ئامێرە دووانە ڕوونماکان، بەڵام MacBook خاوەن تاکە ڕوونمایەکە، سیستەمەکە توانای دەبێت خۆی لەگەڵ ئامێرە تاکە ڕوونماکانیشدا بگونجێنێت.

Video pic.twitter.com/Xc4DfXAc14

— Sunshine Biscuit at scale (@imbushuo) February 13, 2020

یەکێکی دیکە لە تویتەر بە ناوی Steve Troughton-Smith ڕایگەیاندووە کە بەسەرکەوتوویی توانی سیستەمەکە لەسەر تابلێتی Surface Go جێگیر بکات و بیخاتە کار. ڕێبەری دامەزراندنی Windows 10X لەبەردەستتدایە (کرتە بکە) و دەتوانیت تۆش لەسەر ئامێرەکەت جێگیری بکەیت، بەڵام پێویستە کەمێک لەگەڵ کۆدەکانی PowerShell و بەشەکانی بیرگەدا نێوانت باش بێت تاوەکو ئەو کردارە بە ئەنجام بگەیەنیت.

https://twitter.com/stroughtonsmith/status/1228110304216784902

لە چەند ڕۆژی ڕابردوودا، مایکرۆسۆفت پێشبەندی سیستەمی Windows 10X ـی بۆ گەشەپێدەران بەردەستکرد تاوەکو ئەپەکانیان لەگەڵ سیستەمەکەدا بگونجێنن، ئەمەش دەرفەتی بە گەشەپێدەران دا تاوەکو ڕێگای جێگیرکردنی سیستەمەکە لەسەر ئامێرێکی ڕاستەقینە بدۆزنەوە.

وا بڕیارە لە کۆتاییەکانی ئەمساڵدا مایکرۆسۆفت سیستەمی Windows 10X ـی تایبەت بە ئامێرە دووانە ڕوونماکان بەردەست بکات و لە سەرەتادا بە شێوەی بنچینەیی لەسەر Surface Neo و هاوشێوەکانی جێگیر دەبێت.

ماکوان بەرزان

نووسەری پێشکەوتوو، هەوادار و گەشەپێدەری سەکۆکانی ئەپڵ.