سامسۆنگ 8, نیسان 2020

سامسۆنگ مۆبایلەکانی Galaxy A01 و A11 و A21 و A51 5G و A71 5G ـی ڕاگەیاندن

کۆمپانیای سامسۆنگ لێشاوی نوێکردنەوەی زنجیرە مۆبایلەکانی A ـی دەستپێکرد و ئەمڕۆ ژمارەیەک مۆبایلی زنجیرەکەی نوێ کردەوە، کە تێیدا هەندێکیان پشتگیری لە نەوەی پێنجەمی پەیوەندی 5G دەکەن بە نرخێکی کەمەوە.

مۆبایلەکان بریتین لە Galaxy A01 و A11 و A21 و A51 و A51 5G و A71 5G. نرخیان لە 110$ دەست پێدەکەن و گرانبەهاترینیان A71 5G ـە، کە نرخی دەگاتە 600$. هەر وەک لە ناوەکانیان دیارە، مۆبایلەکانی A51 5G و A71 5G پشتگیری لە نەوەی پێنجەمی پەیوەندی 5G دەکەن.

Galaxy A01 و Galaxy A51

مۆبایلەکانی Galaxy A01 و A51 دەبنە یەکەمین مۆبایلەکانی زنجیرەکە کە لە ئەمساڵدا بەردەست بکرێن، لە ڕێکەوتی 9 ـی ئەم مانگە بە نرخی 110$ و 400$ بەردەست دەکرێن.

مۆبایلی A01 خاوەن ڕوونمایەکە بە قەبارەی 5.7 ئینج بە ڕوونی +HD و ڕوونماکەی لە جۆری Infinity-V ـە، کە وای کردووە نۆچی سەر ڕوونماکەی لە شێوەی پیتی “v” ببێت. لە پێشەوە خاوەن کامێرایەکە بە ڕوونی 5 مێگاپێکسڵ و لە پشتەوەش خاوەن دوو دانە کامێرایە بە ڕوونییەکانی 13 و 2 مێگاپێکسڵ. خاوەن پڕۆسێسەرێکی هەشت ناوەکییە بە هەبوونی بیرگەی 16 گێگابایت و پاتری 3,000 ملی ئەمپێرییەوە.

مۆبایلی A51 لە دیزایندا هاوشێوەی Pixel 3A ـی گووگڵە و لە زۆرینەی تایبەتمەندییەکاندا هاوشێوەی Galaxy A50 ـی پار ساڵە. خاوەن ڕوونمایەکی گەورەیە بە قەبارەی 6.5 ئینج بە ڕوونی +FHD لە جۆری OLED Infinity-O و چاڵ لە ژێر ڕوونماکەیدا هەیە کە کامێرایەکی تێدا جێگیر کراوە.

لە پشتەوە خاوەن 3 دانە کامێرایە و ڕوونی کامێرا سەرەکییەکەی 48 مێگاپێکسڵە، فراوانی هاوێنەی کامێرا Ultra Wide ـەکەی 123 پلەیە و کامێراکانی توانای تۆمارکردنی ڤیدیۆی تاوەکو ڕوونی 4K ـیان هەن. خاوەن پڕۆسێسەری 10 نانۆمەتری هەشت ناوەکییە بە هەبوونی ڕامی 4 گێگابایت و بیرگەی 128 گێگابایت و پاتری 4,000 ملی ئەمپێرییەوە.

Galaxy A11 و Galaxy A21

لە پاڵ مۆبایلەکانی A01 و A51، هەریەکە لە مۆبایلەکانی A11 و A21 ـیش بوونیان هەن، کە نرخیان 180$ و 250$ دەبن و لە هاوینی ئەمساڵدا بەردەست دەکرێن. هەردووکیان خاوەن پڕۆسێسەری هەشت ناوەکین.

مۆبایلی A11 خاوەن ڕوونمایەکە بە قەبارەی 6.4 ئینج بە ڕوونی +HD و بە هەبوونی چاڵی ژێر ڕوونما و کامێرایەک لەسەری. لە پشتەوە خاوەن 3 دانە کامێرایە لە جۆرەکانی Wide-angle و Ultrawide-angle و Depth بە هەبوونی پاتری 4,000 ملی ئەمپێری و ڕامی 2 گێگابایت و بیرگەی ناوەکی 32 گێگابایت.

هەرچی دەربارەی مۆبایلی A21 ـە، قەبارەی کەمێک گەورەترە و خاوەن ڕوونمایەکە بە قەبارەی 6.5 ئینج. لە پشتەوە خاوەن 4 کامێرای ڕیزکراوی ستوونییە لە جۆرەکانی Wide-angle و Ultrawide-angle و Depth و Macro، لە پاڵ ئەوەش خاوەن پاترییەکە بە توانستی 4,000 ملی ئەمپێر و ڕامی 3 گێگابایت و پشتگیری لە بارگاویکردنەوەی بێوایەر بە توانای 15 وات دەکات.

Galaxy A51 5G و Galaxy A71 5G

دواین مۆبایلە نوێیەکان، بریتین لە Galaxy A51 5G و Galaxy A71 5G. نرخی A51 5G بڕی 500$ دەبێت و A71 5G ـیش بڕی 600$ دەبێت. هەردوو مۆبایلەکە پشتگیری لە نەوەی پێنجەمی پەیوەندی 5G دەکەن و خاوەن پاتری 4,500 ملی ئەمپێری و هەستەوەری پەنجەمۆری ژێر ڕوونما و بیرگەی 128 گێگابایت و پڕۆسێسەری هەشت ناوەکین. وە هەروەها پشتگیری لە mmWave و sub-600MHz بۆ ڕایەڵە 5G ـییەکانیان دەکەن.

مۆبایلی A51 5G خاوەن ڕوونمایەکە بە قەبارەی 6.5 ئینج لە جۆری Super AMOLED Infinity-O و بە ڕوونی +FHD و لە ژێر ڕوونماکەیدا چاڵ هەیە کە کامێرایەکی 32 مێگاپێکسڵی تێدا جێگیر کراوە. لە پشتەوە خاوەن 4 کامێرایە بە ڕوونییەکانی 48 و 12 و 5 و 5 مێگاپێکسڵ.

خاوەن ڕامی 6 و 8 گێگابایتی و دەرچەی MicroSD ـە بۆ زیادکردنی قەبارەی بیرگە ناوەکییەکەی و پشتگیری لە بارگاویکردنەوەی 15 واتی دەکات. بە ڕەنگەکانی ڕەش و سپی و پەمەییەوە بە نرخی دەستپێکی 500$ لە هاوینی ئەمساڵدا بەردەست دەکرێت.

هەرچی دەربارەی مۆبایلی A71 5G ـە، خاوەن ڕوونمایەکە بە قەبارەی 6.7 ئینج لە جۆری Super AMOLED Plus Infinity-O و بە ڕوونی +FHD و لە ژێر ڕوونماکەیدا چاڵ هەیە کە کامێرایەکی 32 مێگاپێکسڵی تێدا جێگیر کراوە. لە پشتەوە خاوەن 4 دانە کامێرای ئاست بەرزە بە ڕوونییەکانی 64 و 12 و 5 و 5 مێگاپێکسڵ.

خاوەن ڕامی 6 و 8 گێگابایتی و دەرچەی MicroSD ـە بۆ زیادکردنی قەبارەی بیرگە ناوەکییەکەی و پشتگیری لە بارگاویکردنەوەی خێرای 25 واتی دەکات. بە ڕەنگەکانی ڕەش و زیوی و شینەوە بە نرخی دەستپێکی 600$ لە هاوینی ئەمساڵدا بەردەست دەکرێت. دەتوانین بڵێین باشترین مۆبایلی 5G ـییە لە خوار نرخی 1000$ ـەوە.

سەرجەم مۆبایلەکان بە ڕووکاری OneUI 2.0 ـی بنچینەکراو لەسەر Android 10 بەردەست دەکرێن.

بۆچونی تۆ