ئەپڵ کۆمپانیایەکی تایبەت بە بواری زیرەکی دەستکرد دەکڕێتەوە

لە نێو جەنگی کۆمپانیاکان لە بواری زیرەکی دەستکرددا ئەپڵ تاوەکو ئێستا تاڕادەیەک بێدەنگی هەڵبژاردووە. بەڵام وا دیارە ئەپڵ دەیەوێت چیدیکە بێدەنگ نەبێت و یەکەمین هەنگاوی ئاشکرای لەم بوارەدا بریتییە لە کڕینەوەی کۆمپانیای DarwinAi تایبەت بە بواری زیرەکی دەستکرد بە پێی وتەی پێگەی بلوومبێرگ. کۆمپانیاکە کەنەدییە و بە پێی وتەی پێگەکە بێت ئەپڵ لە سەرەتای ئەمساڵ کۆمپانیاکەی کڕیوەتەوە بەڵام تاوەکو ئێستا ئاشکرا نەکراوە. ماڵپەڕ و هەژماری تۆڕە کۆمەڵایەتیەکانی کۆمپانیای DarwinAi دوای کڕینەوەی لە لایەن ئەپڵەوە داخراون و لە ئێستادا بەردەست نین، دەیان کەس لە کۆمپانیای DarwinAi پەیوەندییان بە بەشی زیرەکی دەستکردی ئەپڵ کردووە و توێژەری بواری زیرەکی دەستکرد Alexander Wong کە یارمەتیدەر بووە لە درووست کردنی کۆمپانیاکە، ئێستا بەڕێوبەری گرووپێکی زیرەکی دەستکردە لە کۆمپانیای ئەپڵ.

ئەپڵ لە لێدوانێکدا کڕینی کۆمپانیاکەی پشتڕاست کردەوە و بە شێوەیەکی ئاسایی وتی “ئەپڵ ناوبەناو کۆمپانیا بچووکەکانی تەکنەلۆژیا دەکڕێتەوە” بەڵام باس لە ئامانج و پلانەکانی ناکات. ئەم کڕینەوەیە هەنگاوێکی گەورە و گرنگە پێش ڕاگەیاندنی وەشانی iOS 18 کە پێشبینی دەکرێت وەشانێکی تەواو تێهەڵکێش کراو بێت لە زیرەکی دەستکرد.

میران ئەبوبەکر

بەڕێوبەری نووسین لە پێگە و ماڵپەڕی کەی ئای تی ئێن، خوێندکاری کۆلێژی پزیشکی دەرمانسازی.