بۆچی پاوەربانکی ٢٥٠٠٠ تەنها ٣ جار مۆبایلە ٥٠٠٠ ملی ئەمپێریەکەم بارگاوی دەکاتەوە؟ (وەڵامە زانستییەکە)

زۆرێک لە ئێمە تووشی ئەم دۆخە بووین کە پاوەربانکێکی گەورە دەکڕیت و لەسەری نووسراوە 25,000mAh. بیرکارییەکی سادە دەکەیت و دەڵێیت: “پاتری مۆبایلەکەم 5,000mAhـە، کەواتە ٢٥ دابەشی ٥ دەکاتە ٥ جار بارگاویکردنەوەی تەواو.”

بەڵام کاتێک بەکاری دەهێنیت، دەبینیت تەنها ٣ جار یان کەمێک زیاتر مۆبایلەکەت بارگاوی واتا شەحن دەکاتەوە. ئایا پاوەربانکەکەت فێڵی تێدایە؟ یان تێکچووە؟ نەخێر، هیچ کام لەمانە نییە. ئەمە پەیوەندی بە یاسای فیزیا و شێوازی گواستنەوەی وزەوە هەیە.

لەم بابەتەدا لە کەی ئای تی ئێن هۆکارە زانستییەکەت بۆ ڕوون دەکەینەوە.

١. کێشەی جیاوازی ڤۆڵتییە (The Voltage Trap)

ژمارەی ٢٥,٠٠٠ کە لەسەر پاکەتەکە نووسراوە، توانای پاترییەکانی ناوەوەی پاوەربانکەکەیە، نەک ئەوەی دەیدات بە تۆ.

• پاتری ناوەوەی پاوەربانک کارەباکەی ٣.٧ ڤۆڵتە.

• بەڵام مۆبایلەکەت بۆ شەحنکردنەوە پێویستی بە ٥ ڤۆڵت (یان زیاترە بۆ شەحنی خێرا).

کاتێک پاوەربانکەکە کارەباکە لە ٣.٧ـەوە بەرز دەکاتەوە بۆ ٥ ڤۆڵت، ژمارەی “ملی ئەمپێر”ـەکە کەم دەکات. بە زمانی ژمارە:

٢٥,٠٠٠ (ملی ئەمپێر) × ٣.٧ (ڤۆڵت) ÷ ٥ (ڤۆڵت) = ١٨,٥٠٠ ملی ئەمپێر.

کەواتە پێش ئەوەی کێبڵەکەش لێ بدەیت، پاوەربانکەکەت بە کردەیی بووە بە ١٨,٥٠٠.

٢. باجی گواستنەوە (وزەی بەفیڕۆچوو)

هیچ ئامێرێکی ئەلیکترۆنی بە ڕێژەی ١٠٠٪ کارا نییە. کاتێک وزە دەگوازرێتەوە، بەشێکی دەبێتە گەرمی.

• ئەو گەرمییەی لە پاوەربانکەکە و مۆبایلەکەت دەردەچێت کاتێک بارگاوی دەکەیت، ئەوە وزەی بەفیڕۆچووە.

• بە شێوەیەکی گشتی، پاوەربانکە باشەکان (وەک Anker یان Samsung) نزیکەی ٢٠٪ بۆ ٢٥٪ی وزەکەیان لەم پڕۆسەیەدا لەدەست دەدەن.

٣. ئەنجامی کۆتایی (ملی ئەمپێری تەواو)

دوای لێدەرکردنی جیاوازی ڤۆڵتییە و بەفیڕۆچوونی گەرمی، پاوەربانکێکی ٢٥,٠٠٠ لە ڕاستیدا نزیکەی ١٦,٠٠٠ بۆ ١٧,٠٠٠ ملی ئەمپێری تەواو (Real Output) دەدات بە دەستەوە.

با ئەم ژمارە ڕاستەقینەیە بەراورد بکەین بە مۆبایلەکان:

١. بۆ خاوەنانی Galaxy S25 Ultra

• قەبارەی پاتری: ٥٠٠٠ ملی ئەمپێر.

• ئەنجام: ١٧,٠٠٠ ÷ ٥٠٠٠ = ٣.٤ جار. (واتە ٣ جاری تەواو و نزیکەی نیوەی جارێک).

٢. بۆ خاوەنانی iPhone 17 Pro Max

• قەبارەی پاتری: نزیکەی ٤٨٠٠ ملی ئەمپێر.

• ئەنجام: ١٧,٠٠٠ ÷ ٤٨٠٠ = ٣.٥ جار.

٣. بۆ خاوەنانی ئایفۆنی ئاسایی (iPhone 17)

• قەبارەی پاتری: ٣٥٠٠ ملی ئەمپێر.

• ئەنجام: ١٧,٠٠٠ ÷ ٣٥٠٠ = نزیکەی ٥ جار.

دەرەنجام

ئەگەر پاوەربانکێکی ٢٥ هەزارت کڕی و تەنها ٣ جار و نیو مۆبایلە گەورەکەت (Ultra یان Pro Max)ی بارگاوی کردەوە، دڵنیابە پاوەربانکەکەت ئەسڵە و کێشەی نییە. ئەوەی ڕوودەدات تەنها باجی تەکنەلۆژیایە!

ئەگەر دەتەوێت بزانیت پاوەربانکێک بە تەواوی چەند وزەی تێدایە، سەیری ملی ئەمپێرەکە مەکە، بەڵکو سەیری ژمارەی Wh (Watt-hour) بکە کە لە بەشی خوارەوەی پاوەربانکەکە بە وردی نووسراوە.

سەردار عبدالله

مامۆستای زانکۆ و هەڵگری ماستەر لە فێرکردنی زمانی ئینگلیزی و تەکنەلۆژیا. ساڵانێکە هەواڵ و زانیاری بە زمانی کوردی دەنوسم و ئێستاش لێرە هەم نوسەر و هەمیش بەڕێوەبەری گشتیم بۆ ماوەی زیاتر لە ١٤ ساڵە. هەروەک گرافیک دیزاینەریش خەونی منە! کرتە لە وێنۆچکەی تۆڕە کۆمەڵایەتییەکانم بکەن بۆ ئەوەی زیاتر بمناسن!