وەشانی ٢٠٢٦ی Premiere Pro و After Effectsی بە تایبەتمەندی نایابی ژیری دەستکردەوە بڵاوکرایەوە

١. نوێکارییەکانی Adobe Premiere Pro 26.0

ئەدۆبی لەم وەشانەدا جەختی لەسەر ئاسانکاری “Masking” کردۆتەوە کە یەکێکە لە بێزارکەرترین کارەکانی مۆنتاژ.

• تایبەتمەندی Object Mask بە ژیری دەستکرد: ئێستا دەتوانیت تەنها بە بردنە سەری ماوسەکەت بۆ سەر هەر کەسێک یان شتێک لە ڤیدیۆکەدا، ڕاستەوخۆ دەیناسێتەوە و بە یەک کلیک ماسکی بۆ دەکات. ئەم تایبەتمەندییە زۆر خێرایە و یارمەتیدەرە بۆ جیاکردنەوەی شتە جوڵاوەکان. بەمەش مۆنتێرەکان ئاسانتر دەتوانن دەق و وێنە و شتی تر بخنە پشت مرۆڤ و ئاژەڵ و تەنەکانی تر.

• خێراتر بوونی Tracking: سیستەمی “Shape Masks” نوێ کراوەتەوە و ئێستا ٢٠ هێندە (20x) خێراتر لە جاران “تراکینگ” دەکات. هەروەها توانای هەیە بە هەردوو ئاڕاستەدا (پێشەوە و دواوە) تراک بکات و دەتوانیت ماسکەکان بە ڕووەکانەوە (وەک شاشە یان دیوار) جێگیر بکەیت (3D perspective tracking).

• پەیوەست بوون بە Firefly Boards: ئێستا دەتوانیت ڕاستەوخۆ لەناو پریمیێردا دەستت بەو دیمەن و ستۆری-بۆردانە بگات کە لە Firefly دروستت کردوون و بیانخەیتە ناو پرۆجێکتەکەتەوە.

• تێکەڵکردنی Frame.io V4: پانێڵی Frame.io ئێستا بە تەواوی لەناو بەرنامەکەدایە و پێویست ناکات لێی دەربچیت بۆ بینینی کۆمێنت و تێبینییەکانی تیمەکەت.

٢. نوێکارییەکانی Adobe After Effects 26.0

ئافتەر ئیفێکت هەنگاوێکی گەورەی ناوە بەرەو کارکردن بە 3D و ڤێکتەر.

• باشترکردنی فایلی Vector: ئێستا دەتوانیت فایلەکانی SVG و ئەوانەی لە Illustrator دروستکراون وەک “Shape Layer”ی سروشتی بهێنیتە ناو بەرنامەکە. واتە دەتوانیت دەستکاری ڕەنگ و ئەنیمەیشنی “Gradient” بکەیت بەبێ ئەوەی جۆرایەتی دابەزێت.

• دروستکردنی شێوەی 3D: ئێستا دەتوانیت ڕاستەوخۆ لەناو ئافتەر ئیفێکت شێوەی ئەندازەیی سێ ڕەهەندی (وەک گۆ، سندوق، لوولەک) دروست بکەیت و کۆنتڕۆڵیان بکەیت.

• زیادکردنی ١٣٠٠ مەتێریەڵ: زیاتر لە ١٣٠٠ “Substance 3D material” بە خۆڕایی زیادکراون بۆ ئەوەی ڕاستەوخۆ بەکاریان بهێنیت بۆ شێوە 3Dـیەکان.

• نووسینی جوڵاو (Variable Fonts): کۆنتڕۆڵکردنی فۆنتەکان زۆر پێشکەوتووتر بووە و دەتوانیت ئەنیمەیشن بۆ هەموو وردەکارییەکانی فۆنتەکە بکەیت (وەک قەڵەوکردن یان لارکردنەوە).

وادەی بەردەستبوون

بەپێی بلۆگی فەرمی ئەدۆبی، ئەم وەشانە نوێیانە (Version 26.0) لە ٢٠ی ١ی ٢٠٢٦)ـەوە بەردەستن. بەکارهێنەران دەتوانن لە ڕێگەی ئەپی “Creative Cloud Desktop”ـەوە بەرنامەکانیان نوێ بکەنەوە.