ئۆتۆمبێل 2, شوبات 2020

لە دوای 10 ساڵ، ئۆتۆمبێلی Hummer بە بزوێنەری کارەبایی و توانای 1,000 ئەسپەوە دەگەڕێتەوە

نزیکەی 10 ساڵ دەبێت کە بەرهەمهێنانی ئۆتۆمبێلی Hummer وەستاوە و لەو کاتەوە هیچ جۆرێکی نوێی لێ ڕانەگەیاندراوە. بە شێوەیەکی چاوەڕوان نەکراو، کۆمپانیای جەنەڕاڵ مۆتۆرزی ئەمریکی ڕایگەیاند کە ئۆتۆمبێلی Hummer بە شێوەیەکی جیاواز و توانایەکی زۆر زیاترەوە دەگەڕێتەوە تاوەکو دەست بەسەر بازاڕەکاندا بگرێت.

بە پێی کۆمپانیای جەنەڕاڵ مۆتۆرز بێت، جۆرە نوێیەکەی Hummer بە تەواوەتی کارەبایی دەبێت و بە سووتەمەنی کار ناکات. هەروەها توانای 1,000 ئەسپی دەبێت و دەتوانێت لە 3 چرکەدا لە 0 بگات بە 60 میل. جۆرە نوێیەکەی Hummer لە ژێر براندی GMC ـدا درووست دەکرێت و دەفرۆشرێت، وە کاری درووستکردنی لە کارگەی Detroit-Hamtramck ـی کۆمپانیای جەنەڕاڵ مۆتۆرزدا ئەنجام دەدرێت.

دواین جۆری ئۆتۆمبێلی Hummer لە ساڵی 2010 ـەدا درووستکرا و لەو کاتەوە هیچ جۆرێکی نوێمان لە ئۆتۆمبێلە بەهێزەکە نەبینیوە. درووستنەکردنی ئۆتۆمبێلی Hummer لە ئەو ماوە زۆرەدا، ڕێگەی بە ئۆتۆمبێلە SUV و بارهەڵگرەکان دا تاوەکو دەست بەسەر بازاڕەکانی ئەمریکادا بگرن و سەرنجێکی ئێجگار زۆری کڕیار بە لای خۆیاندا ڕابکێشن.

وا بڕیارە لە ڕێکەوتی 20 ـی مانگی 5 ـی ئەمساڵدا، کۆمپانیای GMC جۆرە نوێیەکە کارەباییەکەی Hummer نمایش بکات و لە کۆتاییەکانی ساڵی داهاتووشدا بەردەست بکرێت. بێگومان لە کاتی بەردەستکردنیدا، زانیاری زیاتر سەبارەت بە Hummer ـە کارەباییەکە دەبیستین.

سەرچاوە The Verge
بۆچونی تۆ