10
ئەپڵ 1, تشرینی دووه‌م 2019 بۆچوون

ئەپڵ خزمەتگوزاری پەخشکەری +Apple TV ـی بە هەبوونی ژمارەیەک فیلم و زنجیرەوە بەردەستکرد

لە پاش تێپەڕبوونی چەند مانگێکی زۆر بەسەر ڕاگەیاندنی خزمەتگوزاری پەخشکەری +Apple TV لە لایەن ئەپڵەوە، دواجار +Apple TV لێرەیە، خزمەتگوزارییەکە ئێستا بە هەبوونی ژمارەیەک فیلم و زنجیرەی تایبەتەوە بۆ بەکارهێنەران بەردەستە.

خزمەتگوزاری پەخشکەری +Apple TV تایبەتە بە فیلم و زنجیرەکان و سەرجەم فیلم و زنجیرەکانی نێو خزمەتگوزارییەکە لە لایەن ئەپڵەوە کاری بەرهەمهێنیان بۆ کراون و تایبەت دەبن بە خزمەتگوزارییەکە. جۆرایەتی (کوالێتی) ڤیدیۆی فیلم و زنجیرەکان 4K HDR ـن. نرخی بەژداریکردن 4.99$ ـە بۆ هەر مانگێک و لەگەڵ یەکەم بەژداربووندا، 7 ڕۆژ بە خۆڕایی وەردەگریت بۆ تاقیکردنەوەی خزمەتگوزارییەکە، ئەگەر بەدڵت نەبوو دەتوانیت بەر لە 7 ڕۆژەکە، بەژداربوونەکەت پوچەڵ بکەیتەوە. هەروەها دەتوانرێت خزمەتگوزارییەکە هاوبەشی پێبکرێت بۆ بەشی خێزانی Family Sharing ـی خزمەتگوزاری iCloud.

خزمەتگوزارییەکە لە ئەپی TV ـی سەکۆیەکانی iOS و iPadOS و tvOS و macOS ـدا بۆ ئامێرەکانی ئایفۆن و ئایپاد و ئایپۆد و ئەپڵ تیڤی و ماکەکان بەردەستە و بەکارهێنەران دەتوانن بە شێوەیەکی ئازاد خزمەتگوزارییەکە لەسەر سەکۆ ناوبراوەکان بەکاربهێنن.

هەروەها خزمەتگوزارییەکە لە هەریەکە لە سەکۆیەکانی Amazon Fire TV و Roku و تەنانەت وێبیشدا بەردەستە (کرتە بکە بۆ کردنەوەی خزمەتگوزارییەکە لە وێب).

خزمەتگوزاری +Apple TV فیلم و زنجیرە لە چەشنەکانی کۆمیدیا، شانۆ، هەست بزوێن، بەڵگەنامەیی و پڕۆگرامی تایبەت بە منداڵان دەستەبەر دەکات.

لە ئێستادا 8 زنجیرە و 1 فیلم لە نێو خزمەتگوزارییەکەدا بوونیان و هەن و بە بەردەوامی فیلم و زنجیرەی نوێ بۆ ناو خزمەتگوزارییەکە زیاد دەکرێت. بە بێ بەژداربوون لە خزمەتگوزارییەکە، دەتوانیت بینەری 2 زنجیرە (ئیپیسۆد) ببیت بە خۆڕایی.

ئەپڵ دەیەوێت بە شێوەیەکی بەهێز ڕکابەرێتی Netflix و هاوشێوەکانی بکات، هەر بۆیە بەم نرخی بەژداربوونە کەمەوە هاتە نێو گۆڕەپانەکەوە.

بۆچونی تۆ