مۆبایل و تابلێت 25, تشرینی دووه‌م 2019

هواوەی تابلێتی MatePad Pro ـی بە چاڵی ژێر ڕوونما و نرخی دەستپێکی 470$ ـەوە ڕاگەیاند

لە بۆنەیەکی تایبەتدا، کۆمپانیای هواوەی تابلێتی MatePad Pro ـی بە چاڵی ژێر ڕوونما و نرخی دەستپێکی 470$ ـەوە ڕاگەیاند.

پێشووتر بۆ چەند جارێک وێنەکانی تابلێتەکەی هواوەی دزەیان پێکرا و بڵاوکرابوونەوە، هەر بۆیە دەمانزانی کە شێوەی چۆن دەبێت. لە دیزایندا، هاوشێوەی تابلێتەکانی iPad Pro ـی ئەپڵ و Galaxy Tab S6 ـی سامسۆنگە. خاوەن ڕوونمایەکی گەورەیە بە قەبارەی 10.8 ئینج لە جۆری LCD و بە وردی نیشاندانی 2560 بە 1600 پێکسڵ و بە چێوەی 16:10. هواوەی دەڵێت ڕوونمای تابلێتەکە ڕێژەی 90% ـی چێوەی گرتۆتەوە، ئەمەش بە مانای ئەوە دێت کە چوارچێوەیەکی زۆر کەمی هەیە.

لە پشتەوە خاوەن کامێرایەکە بە ڕوونی 13 مێگاپێکسڵ و لە پێشەوەش خاوەن کامێرایەکە بە ڕوونی 8 مێگاپێکسڵ و لەسەر چاڵی ژێر ڕوونماکەی جێگیر کراوە. پڕۆسێسەری Kirin 990 ـی 7 نانۆمەتری لەسەر جێگیرە و خاوەن ڕامی 6 و 8 گێگابایت و بیرگەی ناوەکی بە قەبارەی 128 و 256 و 512 گێگابایتە. خاوەن پاترییەکی زەبەلاحە بە توانستی 7,250 ملی ئەمپێر و پشتگیری لە بارگاویکردنەوەی خێرا دەکات بە توانای 40 وات.

گرنگترین تایبەتمەندییەکانی تابلێتی Huawei MatePad Pro:

  • ڕوونماقەبارە: 10.8 ئینج. جۆر: LCD. وردی نیشاندان: 2560 بە 2560 پێکسڵ.
  • دیزایننۆچ: نییە. چاڵی ژێر ڕوونما: هەیە.
  • پڕۆسێسەر: (HiSilicon Kirin 990 (7 nm.
  • گرافیک: Mali-G76 MP16.
  • ڕام: 6 و 8 گێگابایت.
  • بیرگە: 128 و 256 و 512 گێگابایت.
  • ئەستووری: 7.2 میلیمەتر.
  • کێش: 460 گرام.
  • پاتری: 7,250 ملی ئەمپێر/کاتژمێر.
  • بارگاویکردنەوە: پشتگیری لە بارگاویکەرەوەی خێرا بە توانای 40 وات.
  • کامێرای پشتەوەسەرەکی: 13 مێگاپێکسڵ بە تیرەی f/1.8 و لە جۆری Wide.
  • کامێرای پێشەوە(سێڵفی): 8 مێگاپێکسڵ بە تیرەی f/2.0.
  • هەستەوەری ئاسایشی: نییە.
  • دەرچە: USB-C و بیستۆک.
  • ڕایەڵە: LTE – Wi-Fi 802.11 a/b/g/n/ac – dual-band – Wi-Fi Direct – hotspot – Bluetooth 5.0. تایبەتمەندی NFC: هەیە. تایبەتمەندی Radio: نییە.
  • سیمکارت: دوانە سیمکارت.
  • ڕەنگ: سپی – خۆڵەمێشی – سەوز – پڕتەقاڵی.
  • سیستەمی کارپێکەر: EMUI 10 (بنچینەکراو لەسەر Android 10).
  • حاڵەتی بەردەستبوون: بەردەست نییە.
  • نرخ: دەست پێدەکات لە 470$.

تابلێتەکە خاوەن قەڵەمێکی زیرەکە تایبەت بە نەخشاندن بە ناوی M-Pencil و بە شێوەی بێوایەر لە ڕێگەی تابلێتەکەوە بارگاوی دەکرێتەوە، هاوشێوەی Apple Pencil ـی ئەپڵ. هەروەها تابلێتەکە پشتگیری لە تەختەکلیلی زیرەک دەکات.

ڕووکاری EMUI 10 ـی بنچینەکراوی لەسەر Android 10 ـی لەسەر جێگیرە و سیستەمەکەی پشتگیری لە کردنەوەی چەند پەنجەرەیەک دەکات لە یەک کاتدا. بەڵام، بەداخەوە خاوەن کۆگای Google Play و هیچکام لە ئەپە سەرەکییەکانی گووگڵ نییە.

تابلێتەکە پشتگیری لە دەنگی Histen 6.0 دەکات و خاوەن 4 دانە بڵندگۆ و دەرچەی USB-C و بیستۆکە و پشتگیری لە تایبەتمەندییەکانی Wi-Fi 802.11ac و Bluetooth 5.1 و GPS دەکات، هەروەها جۆرێکی تایبەتی لێ بەردەست دەکرێت کە پشتگیری لە ڕایەڵەی LTE دەکات.

تابلێتی MatePad Pro بە ڕەنگەکانی سپی و ڕەش و پڕتەقاڵی و سەوز لە ڕێکەوتی 12 ـی مانگی داهاتووەوە بەردەست دەکرێت. داواکاری پێشوەختە لە ئێستاوە کراوەیە بۆ تابلێتەکە.

نرخەکان

جۆری Wi-Fi:

  • ڕامی 6 گێگابایت و بیرگەی 128 گێگابایت: 470$.
  • ڕامی 8 گێگابایت و بیرگەی 256 گێگابایت: 570$.

جۆری LTE:

  • ڕامی 6 گێگابایت و بیرگەی 128 گێگابایت: 540$.
  • ڕامی 8 گێگابایت و بیرگەی 256 گێگابایت: 640$.
  • ڕامی 8 گێگابایت و بیرگەی 512 گێگابایت: 853$.

قەڵەم و تەختەکلیلی زیرەک لەگەڵ پاکەتەکەدا بوونی نییە، هەر بۆیە پێویستە بە جیا و بە نرخی 70$ و 100$ بیانکڕیت.

وا بڕیارە لە سەرەتاکانی ساڵی داهاتوودا جۆری پشتگیر لە 5G لە تابلێتەکە بەردەست بکرێت.

سەرچاوە Gizmochina
بۆچونی تۆ