دەنگۆ: ئەپڵ 2 دانە جۆر بە قەبارەی جیاوازەوە لە مۆبایلی iPhone SE 2 ڕادەگەیەنێت

هەبوونی دەنگۆکان لەسەر نەوەی دووەمی iPhone SE، مێژوویەکی زۆر درێژی هەیە. ئێستاش بۆ دووبارە دەنگۆیەکی نوێ سەبارەت بە iPhone SE 2 بوونی هەیە، بەڵام لە هەموو دەنگۆکانی ڕابردوو جیاوازترە.

پێگەی DigiTimes لە نوێترین ڕاپۆرتیدا بە پشتبەستن بە زانیاری لە لایەن دابینکەرێکی ئەپڵەوە، ڕایگەیاندووە کە iPhone SE 2 ـی نوێ بە 2 جۆری نوێوە ڕادەگەیەندرێت و قەبارەی هەردوو جۆرەکە جیاواز دەبن.

ڕاپۆرتەکە دەڵێت جۆری ڕوونمای یەکێک لە iPhone SE 2 ـە نوێیەکان، OLED دەبێت و ئەوی دیکەشیان LCD دەبێت، هەروەها قەبارەی جۆرە OLED ـەکە 4.7 ئینج دەبێت بە بێ هەبوونی چوارچێوە و قەبارەی جۆرە LCD ـەکەش 5.5 یاخود 6.1 ئینج دەبێت.

لە پێشوودا پێشبینیکەری بەناوبانگ، Ming-Chi Kuo، ڕایگەیاندبوو کە تەنها 1 جۆر لە مۆبایلی iPhone SE 2 ڕادەگەیەندرێت بە هەبوونی دیزاینێکی هاوشێوەی iPhone 8 و هەبوونی هەستەوەری ناسێنەرەوەی پەنجەمۆر و پڕۆسێسەری A13 و ڕامێک بە فراوانی 3 گێگابایت، هەروەها ڕەنگی سووریش یەکێک دەبێت لە بژاردەی ڕەنگەکانی.

کاتێک کە Kuo ڕایگەیاند iPhone SE 2 ـە نوێیەکە لە مانگی 2 ـی ئەمساڵدا ڕادەگەیەندرێت، ڕاپۆرتەکەی DigiTimes دەڵێت iPhone SE 2 ـە نوێیەکان لە کۆتاییەکانی ئەمساڵ یاخود سەرەتای ساڵی داهاتوودا ڕادەگەیەندرێن.

پێویستە ئەوە ڕەچاو بکەین کە پێگەی DigiTimes زۆر لە دابینکەرەکانی ئەپڵەوە نزیکە و زۆرینەی زانیارییەکانی لە ماوەی ڕابردوودا ڕاست دەرچوون. Kuo ـیش بە هەمان شێوەی پێشبینیکەرێکی بەناوبانگە و ژمارەیەکی زۆر لە پێشبینییەکانی ڕاست دەرچوون لە ڕابردوودا.

بەڕێز Kuo لە پێشوودا ڕایگەیاندبوو کە پێشبینی دەکات ئایفۆنە نوێیەکانی ئەمساڵ قەبارەیان 5.4 و 6.1 و 6.7 ئینج ببن، هەروەها سەرجەمیان پشتگیری لە نەوەی پێنجەمی پەیوەندی 5G دەکەن.

ماکوان بەرزان

نووسەری پێشکەوتوو، هەوادار و گەشەپێدەری سەکۆکانی ئەپڵ.