چیپسێتە نوێیەکەی میدیاتێک ئامادەیە بۆ زیرەکی دەستکرد و مۆبایلە سێ لا نوشتاوەکان

میدیاتێک بە فەرمی نوێترین و بەهێزترین چیپسێتی بۆ مۆبایلەکە ئاست بەرزەکان بە ناوی Dimensity 9400 ڕاگەیاند. چیپسێتەکە لەسەر بناغەی 3 نانۆمەتری بونیاد نراوە و میدیاتێک دەڵێت “%40 وزە کەمتر بەهەدەر دەدات” بەراورد بە نەوەی پێش خۆی.

8 ناووکی هەیە، سەرەکییەکەیان لە جۆری Arm Cortex-X925 بە خێرایی 3.62 گێگاهێرتز کە 1 دانەیە. هەروەها 3 دانەی تر لە جۆری Cortex-X4 و 4 دانەش لە جۆری Cortex-A720 لە خۆ دەگرێت.

میدیاتێک دەڵێت بەروارد بە چیپسێتی Dimensity 9300 بە ڕێژەی %35 لە ڕووی کارایی (Performance) تاک ناووک و %28 لە ڕووی کارایی فرە ناووک باشتر کراوە. هەروەها چیپسێتەکە گرافیکی نوێی 12 ناووکی Immortalis-G925 لەسەر جێگیر کراوە کە %40 خێراترە لە Ray Tracing ـدا.

چیپسێتە نوێیەکەی میدیاتێک نەوەی هەشتەمی NPU بۆ زیرەکی دەستکرد هەیە. یەکەمین چیپسێتە کە پشتگیری لە درووست کردنی ڤیدیۆ بە شێوەیەکی بنچینەیی و بە جۆرایەتی بەرز و بە بەکارهێنانی زیرەکی دەستکرد بکات. هەروەها %80 خێراتر کراوە لە ڕووی کارایی مۆدێلی زمانی گەورەی زیرەکی دەستکردەوە. پشتگیری لە Wi-Fi 7 دەکات، هەروەها پشتگیری لە مۆبایلە 3 لا نوشتاوەکانیش دەکات.

هەروەها یەکەمین چیپسێتی جیهانە کە پشتگیری لە ڕامی LPDDR5X بە خێرایی 10.7 گێگابت بکات. پشتگیری لە تۆمار کردنی ڤیدیۆ بە ڕوونی 4K و 60 وێنە لە چرکەیەکدا دەکات.

ئەم چیپسێتە بۆ یەکەمین جار لەسەر ئەو مۆبایلانە جێگیر دەکرێت کە لە چارەکی 4 ئەمساڵ بڵاو دەکرێنەوە. یەکەمین بەرهەم کە ئەم چیپسێتەی لەسەر جێگیر دەکرێت بریتییە لە Oppo Find X8 کە لە ڕۆژی 24ی ئەم مانگە نمایش دەکرێت.

میران ئەبوبەکر

بەڕێوبەری نووسین لە پێگە و ماڵپەڕی کەی ئای تی ئێن، خوێندکاری کۆلێژی پزیشکی دەرمانسازی.