ئەپڵ ئەمڕۆ هەمووانی سەرسام کرد بە ڕاگەیاندنی کۆمەڵێک بەرهەمی نوێ کە بەتەواوی ئاستی کێبڕکێی لە جیهانی تەکنەلۆژیادا بەرزکردەوە. لە چیپە ئاستبەرز و بەهێزەکانی M5 Pro و M5 Maxـەوە بگرە، تا دەگاتە لاپتۆپە نوێیەکان و ڕوونمایەکی بێ وێنە. ئەگەر نەتتوانیوە بەدواداچوون بۆ هەواڵەکانی ئەمڕۆ بکەیت، خەمت نەبێت! لێرەدا پوختەیەکی هەموو ئەو بەرهەمانە دەخەینە ڕوو کە ڕاگەیەندراون.
١. چیپەکانی M5 Pro و M5 Max
ئەپڵ وازی لە دیزاینە کۆنەکە هێناوە و بۆ یەکەمجار لە مێژووی خۆیدا تەکنەلۆژیایەکی نوێی بەکارهێناوە بە ناوی Fusion Architecture. ئەمە واتە دوو چیپ پێکەوە بەستراون بۆ دروستکردنی یەک چیپی گەورە و یەکگرتوو!
هەردوو چیپەکە خاوەنی پڕۆسێسەری (CPU) ١٨-ناوکن، کە ٦ ناوکیان ناونراون “Super Cores” بۆ کارە زۆر قورسەکان. ئەمەش وایکردووە ٣٠٪ خێراتر بن لە نەوەی پێشوو. هەروەک بۆ ئەوەی ڕکابەری سەردەمی AI بکات، ئەپڵ تایبەتمەندی “Neural Accelerators”ی خستووەتە ناو گرافیکەکانەوە (GPU)، کە توانای کارکردنی بە ژیریی دەستکرد چوار هێندە زیاد کردووە! گرافیکەکەی دەگاتە ٤٠-ناوک و پشتگیری ١٢٨ گێگابایت ڕام دەکات بە خێراییەکی شێتانەی گواستنەوە کە دەگاتە 614GB/s.
٢. ماکبووک پرۆ (MacBook Pro): کۆتایی بە کێشەی بیرگە!
بە پشت بەستن بەم چیپە نوێیانە، مۆدێلەکانی ١٤ و ١٦ ئینجی ماکبووک پرۆ گەیشتنە ئاستێکی تر کە باوەڕپێکردنی قورسە:
چیتر بیرگەی کەم کێشە نییە. مۆدێلی M5 Pro لە ١ تێرابایتەوە دەست پێدەکات، و مۆدێلی M5 Max لە ٢ تێرابایتەوە! هەروەها خێرایی خوێندنەوەی SSDیەکان دوو هێندە زیادیکردووە و دەگاتە 14.5GB/s.
بەهۆی چیپی نوێی N1ـەوە، ئێستا پشتگیری لە ئینتەرنێتی خێرای Wi-Fi 7 و Bluetooth 6 دەکەن. هەروەها خاوەنی دەرچەی پێشکەوتووی Thunderbolt 5ـن.
لەڕووی پاترییەوە، تا ٢٤ کاتژمێر کارکردن بەرگە دەگرێت. ئینجا نرخەکانی بۆ مۆدێلی M5 Pro لە ٢،١٩٩ دۆلارەوە دەست پێدەکات و بەپێی بیرگە و ڕام نرخەکەی بەرز دەبێتەوە.
٣. خۆشەویستەکەی هەمووان: ماکبووک ئێیەر (MacBook Air بە M5)
ئەپڵ لاپتۆپە تەنک و سووکەکەشی لەبیر نەکردووە. ماکبووک ئێیەری نوێ بە چیپی M5 بەردەست کرا و سوپڕایزێکی گەورەی بۆ کڕیاران تێدایە. نرخی دەستپێکی لاپتۆپەکە بووەتە ١،٠٩٩ دۆلار (واتە ١٠٠ دۆلار گرانتر بووە)، بەڵام لە بەرامبەردا بیرگە سەرەتاییەکەی کراوە بە ٥١٢ گێگابایت لە جیاتی ٢٥٦ گێگابایت. ئەمەش هەواڵێکی زۆر دڵخۆشکەرە.
خاوەنی پڕۆسێسەری ١٠-ناوکە و ئەویش Neural Accelerators بۆ زیادکراوە، کە وایکردووە ٤ هێندە خێراتر بێت لە مۆدێلی M4 بۆ جێبەجێکردنی ئەرکەکانی ژیریی دەستکرد، سەرەڕای ئەوەی Wi-Fi 7 یشی بۆ زیادکراوە.
٤. مۆنیتەری Studio Display XDR
ئەپڵ کۆتایی بە مۆنیتەری (Pro Display XDR) هێنا و لە جێگەی ئەوە یەکێکی نوێی بە ناوی Studio Display XDR ڕاگەیاند، کە تایبەتە بە دیزاینەران و کەسە پڕۆفیشناڵەکان.
ڕوونمایەکی ٢٧ ئینجییە لە جۆری Mini-LED بە ڕوونی خەیاڵی 5K. ڕووناکییەکەی دەگاتە ٢٠٠٠ نیت (Nits) بۆ بینینی ناوەڕۆکی HDR و تێکڕای نوێبوونەوەی دەگاتە 120Hz (ProMotion).
خاوەنی دوو دەرچەی Thunderbolt 5ـە کە دەتوانێت بە هێزی 140W ڕاستەوخۆ لاپتۆپەکەت شەحن بکاتەوە لەکاتی بەکارهێناندا.
بێگومان ڕوونمایەکی وا هەرزان نابێت؛ نرخەکەی لە ٣،٢٩٩ دۆلارەوە دەست پێدەکات بۆ شووشەی ئاسایی، و دەگاتە ٣،٥٩٩ دۆلار بۆ شووشەی نانۆ (Nano-texture) کە دژە-درەوشانەوەیە.
بە کورتی، ئەپڵ ئەمساڵ فۆکەسی تەواوی خستووەتە سەر بەهێزکردنی تواناکانی ژیریی دەستکرد (AI)، لەگەڵ زیادکردنی قەبارەی بیرگە (Storage) بەڵام نرخیان چۆتە سەرەوە، ئیتر نرخەکە زۆرە یان کەم ئەوا دەکەوێت سەر بەکارهێنەران.
لە کۆمێنت پێمان بڵێ: کام لەم بەرهەمانەی ئەمڕۆ زیاتر سەرنجی ڕاکێشایت؟ ئایا بیر لە کڕینی هیچ کامیان دەکەیتەوە؟
