لە جیهانی ئەمڕۆدا، تەکنەلۆژیا تەنها ئامرازێک نییە بۆ خۆشگوزەرانی، بەڵکو بڕبڕەی پشتی بەڕێوەبردنی دامەزراوەکانە. وەزارەتی پەروەردەی حکومەتی هەرێمی کوردستان لە چەند ساڵی ڕابردوودا هەنگاوێکی بوێرانەی نا بە بەدیجیتاڵکردنی پرۆسەی پەروەردە لە ڕێگەی سیستەمی “ئی-پەروەردە”، کە دوو لقی ناوی بریتین لە “ئی-هەڵسەنگاندن” بۆ مامۆستایان و خوێندنگە و خوێندکاران و “قوتابخانەکەم” بۆ خوێندکار و مامۆستایان. ئەم هەنگاوانە بەرزدەنرخێنم، بەڵام وەک شارەزایەکی بواری تەکنەلۆژیا و پەروەردە، لێرەدا تیشک دەخەمە سەر لایەنە ئەرێنی و نەرێنییەکانی ئەم ئەزموونە و بۆچوونی خۆم لەبارەیانەوە دەخەمەڕوو.
خاڵە بەهێزەکان: گۆڕینی کەلتووری “دەفتەری نمرە”
ناتوانین نکۆڵی لە گرنگی ئەم هەنگاوە بکەین. گەورەترین دەستکەوتی ئەم پلاتفۆرمانە بریتییە لە:
-
شەفافیەت و خێرایی: لە ڕێگەی ئەپی “ئی-هەڵسەنگاندن”، دایک و باوک چیتر پێویست ناکات مانگانە سەردانی قوتابخانە بکەن بۆ زانینی نمرە یان ئامادەبوونی منداڵەکەیان. لەوێ هەیە و هەموو شتێک بە “نۆتیفیکەیشن” دەگات بێگومان ئەگەر بەدروستی لەلایەن مامۆستایان و قوتابخانەکانەوە بەکاربهێندرێت.
-
کەمکردنەوەی هەڵە: لە “ئی-هەڵسەنگاندن”دا، سیستەمەکە خۆی کۆکردنەوەی نمرەکان (Average) ئەنجام دەدات. ئەمەش کۆتایی هێنا بەو هەڵە زۆرانەی لە کاتی کۆکردنەوەی دەستیدا ڕوویان دەدا.
-
داتای ناوەندی: ئێستا وەزارەت خاوەنی داتایەکی گەورەیە (Big Data) لەسەر ئاستی هەموو قوتابیانی هەرێم، کە دەکرێت بۆ پلاندانانی ستراتیژی سوودی لێ ببینرێت.
- لە ئەپی قوتابخانەکەم، بەشێوەیەکی دیجیتاڵی زۆر نایاب و پێشکەوتوو پڕۆگرامی خوێندنیان بەردەست کردووە کە قوتابی بە کۆد و وشەی نهێنی خۆیەوە دەچێتە ناو سیستەمەکە و بەشێوەی کارلێک Interactive سود لەناوەڕۆکی سیستەمەکە وربگرن و هەریەک لەوانەکان بکەنەوە. تەنانەت دەتوانن ئەرکی ماڵەوەش ببینن ئەگەر مامۆستا بۆی دانابن.
- هەروەک لە ئەپی قوتابخانەکەم زیرەکی دەستکرد بەشێوەی ئەزموونی هەیە، بەڵام زۆر ویستم کاری پێ بکەم، لەلای من ئیشی نەکرد.
گرفتە و کێشەکان: چی ونە؟
سەرەڕای باشییەکان، سیستەمەکان هێشتا لە قۆناغی “سەرەتایی”دان نەک “زیرەکی”. لێرەدا چەند کەمکورتییەک دەخەمە ڕوو:
١. نەبوونی شیکاری زیرەک (AI Analytics): سیستەمەکە تەنها ژمارەکان پیشان دەدات. پێویستە بەرەو ئەوە بڕوات کە بەهۆی زیرەکی دەستکردەوە پێشبینی دابەزینی ئاستی قوتابی بکات و ئاگاداری پێشوەختە بداتە دایک و باوک (Predictive Analysis).
٢. کێشەی سێرڤەر و تەکنیکی: هەموو ساڵێک لە کاتی بڵاوکردنەوەی ئەنجامە گشتییەکان، سیستەمەکە تووشی وەستان (Crash) یان خاوبوونەوە دەبێت، کە ئەمەش نیشانەی لاوازی ژێرخانی سێرڤەرەکانە و ئەمەش بەتایبەت لە ئی هەڵسەنگاندن ڕوودەدات.
٣. ئەزموونی بەکارهێنەر (UX): دیزاینی ئەپڵیکەیشنەکان و وێبسایتەکە تا ڕادەیەک کلاسیکییە و لە ئاستی پێویستدا نییە. ئەم سەرەنجەم زیاتر ئاراستەی ئی-هەڵسەنگاندنە چونکە دیزاینەکەی وەکو قوتابخانەکەم هاوچەرخ نییە.
٤. پەیوەندی یەکلایەنە: “قوتابخانەکەم” تەنها زانیاری دەدات، بەڵام میکانیزمێکی نییە بۆ گفتوگۆی ڕاستەوخۆ لە نێوان مامۆستا و دایک و باوک لەناو ئەپەکەدا، کە هیوادارم من هەڵەبم چونکە نەمبینی، بەڵکو تەنها پڕۆگرام واتا کتێبەکان بەشێوەی کارلێک و دیجیتاڵی بەردەست کراون.
چۆن هۆشیاری زیاد بکەین؟
پێم وایە بۆ ئەوەی ئەم دوو سیستەمە سەرکەوتوو بن، تەنها دروستکردنی ئەپ و سیستەمەکان بەس نییە، بەڵکو پێویستە:
-
راهێنانی بەردەوام: زۆرێک لە مامۆستایان هێشتا کێشەیان لە بەکارهێنانی تەکنەلۆژیادا هەیە. پێویستە سیمیناری وەرزی بۆ چۆنیەتی بەکارهێنانی “ئی-هەڵسەنگاندن” و “قوتابخانەکەم” بکرێت.
-
ڤیدیۆی فێرکاری بۆ دایک و باوکان: وەزارەت یان قوتابخانەکان دەبێت ڤیدیۆی کورت (ڕیل) دروست بکەن بۆ فێرکردنی دایک و باوک کە چۆن ئەپ و سیستەمەکان بەکاربهێنن.
-
گرنگیدان بە ئاسایشی داتا: دەبێت دڵنیایی تەواو بدرێت بە بەکارهێنەران کە داتای منداڵەکانیان پارێزراوە و بۆ هیچ مەبەستێکی بازرگانی بەکارنایەت و بە ئاسانی هاکەران نەتوانن سیستەمەکە هاک بکەن و دواتر داتاکە کڕین و فرۆشتنی پێوە بکرێت.
سیستەمی “ئی-پەروەردە” و لق و پۆپەکانی سەرەتایەکی زۆر باشە و جێگای دەستخۆشییە، بەڵام نابێت لە قۆناغی “بەدیجیتاڵکردنی کاغەز”دا بوەستێت. داهاتووی ئەم پلاتفۆرمانە لە بەکارهێنانی “زیرەکی دەستکرد” و باشترکردنی ئەزموونی بەکارهێنەردایە. ئایا وەزارەت ئامادەیە بۆ وەشانەکانی داهاتووی ئەم شۆڕشە تەکنەلۆژییە؟ یان وەکو زۆربەی پڕۆژەکانی تری ئەم هەرێمە دوای ماوەی بەڕێز وەزیری پەروەردەی ئێستا، ئەم پڕۆژانەش دەپوکێنەوە و لەپەرەپێدان دەوەستن؟ داهاتوو وەڵامی ئەم پرسیارانەمان دەداتەوە.
ئێستا تۆ پێم بڵێ، ئەگەر ئی هەڵسەنگاندن و قوتابخانەکەمت بەکارهێناوە، بۆچوونت لەسەریان چییە؟
لەم لینکەوە بچۆ ناو ماڵپەڕی قوتابخەنەکەم. کرتە بکە.
لەخوارەوە ئەپی ئی-هەڵسەنگاندن بۆ ئەندرۆید و ئای ئۆ ئێس دابگرە:
e-Halsangandn
دابەزاندن
e-Halsangandn
دابەزاندن
