ئەپڵ دەڵێت بە ئەپدەیت کێشەی گەرمبوونی ئایفۆن 15 چارەسەر دەکەین

لە ماوەی هەفتەی ڕابردوودا ژمارەیەک لە بەکارهێنەرانی ئایفۆن 15 و ئایفۆن 15 پڕۆ گلەییان لە گەرمبوونی ئامێرە نوێیەکانیان کردووە و ئاماژەیان بەوە کردووە کە پلەی گەرمی مۆبایلەکانیان نائاسایی بەرز دەبێتەوە. لە وەڵامی ئەو سکاڵایانەدا کۆمپانیای ئەپڵ ڕایگەیاندووە کە نوێکردنەوەیەک لە ڕێگادایە بۆ چارەسەرکردنی کێشەکە.

ئەپڵ لە بەیاننامەیەکدا بۆ تۆڕی فۆربێس ئاماژەی بەمە کردووە و دەڵێت:

“چەند حاڵەتێکمان دەستنیشان کردووە کە دەتوانێت ببێتە هۆی ئەوەی ئایفۆن گەرمتر لەوەی چاوەڕوان دەکرا دابێت. بەهۆی زیادبوونی چالاکییەکانی پاشبنەما.”

هەروەها ئەپڵ دەڵێت کە “هەڵەیەکی لە iOS 17 دەستنیشان کردووە کە کێشەی گەرمبوونی زۆر بۆ بەکارهێنەرانی ئایفۆن 15 و ئایفۆن 15 Pro خراپتر دەکات. کۆمپانیاکە دەڵێت ئەم کێشەیە “لە نوێکردنەوەیەکدا چارەسەر دەکرێت”. وە لە کۆتاییدا، ئەپڵ ڕوونی دەکاتەوە کە “نوێکردنەوەکانی ئەم دواییە بۆ هەندێک ئەپی لایەنی سێیەم کە ناویان نەهاتووە، دەبێتە هۆی ئەوەی کە سیستەمەکە بارێکی زۆرتری لەسەر بێت.” کۆمپانیاکە دەڵێت ڕاستەوخۆ لەگەڵ ئەو گەشەپێدەرانە کاردەکات بۆ چارەسەرکردنی کێشەکە.

میران ئەبوبەکر

بەڕێوبەری نووسین لە پێگە و ماڵپەڕی کەی ئای تی ئێن، خوێندکاری کۆلێژی پزیشکی دەرمانسازی.