گووگڵ پشتڕاستی کردەوە لە داهاتوودا مۆبایل لە هیندستان بەرهەم دەهێنێت

لە نۆیەمین بۆنەی ساڵانەی گووگڵ لە هیندستان کۆمپانیاکە ڕاگەیاندراوێکی گرنگی بڵاو کردەوە. گووگڵ ئاشکرای کرد لە داهاتوودا مۆبایلی گووگڵ پێکسڵ لە هیندستان بەرهەم دەهێنێت. دوای بەرز بوونەوەی خواستی کڕیاران لەو وڵاتە بۆ مۆبایلەکانی گووگڵ پێکسڵ، جێگری سەرۆکی باڵای گووگڵ بۆ ئامێر و خزمەتگوزارییەکان، Rick Osterloh، هیندستانی وەک یەکێک لە گرنگترین بازاڕەکانی جیهان بۆ مۆبایلەکانی گووگڵ پیکسڵ دیاری کرد. ئامانجی گووگڵ ئەوەیە کە لە ساڵی داهاتوودا دەست بکات بە بەرهەمهێنانی زنجیرە مۆبایلی گووگڵ پێکسڵ 8 لە هیندستان و پاشان بەرهەمهێنانی مۆدێلەکانی دیکەش.

We shared plans at #GoogleforIndia to manufacture Pixel smartphones locally and expect the first devices to roll out in 2024. We’re committed to being a trusted partner in India’s digital growth- appreciate the support for Make In India @PMOIndia + MEIT Minister @AshwiniVaishnaw.

— Sundar Pichai (@sundarpichai) October 19, 2023

ئەم بڕیارەی کۆمپانیاکە سەرکەوتنێکی دیکەیە بۆ حکومەتی هیندستان، پێشووتر کۆمپانیا بەناوبانگەکانی وەک سامسۆنگ و ئەپڵی بۆ لای خۆی ڕاکێشاوە بۆ ئەوەی وەبەرهێنانی گەورە لە وڵاتەکەیدا بکەن، وە ئێستاش گووگڵ وەبەرهێنان لە وڵاتەکەیدا دەکات. ئەپڵ بۆ یەکەمجار لە ساڵی 2017 ئایفۆنی لە هیندستان بەرهەم هێنا، بەڵام ئەوکاتە بەرهەمهێنانەکان بۆ مۆدێلی کۆنتر بوون. هەروەها بەرهەمهێنان لە سەرەتادا شەش بۆ نۆ مانگ لە دوای چینەوە بوو بەڵام بە شێوەیەکی بەردەوام باشتر بووە. بۆیە چاوەڕوان دەکرێت لە داهاتوودا بازاڕی هیندستان ببێت بە یەکێک (یاخوود گەورەترین) بازاڕە گەورەکانی مۆبایلی زیرەک لە جیهاندا.

میران ئەبوبەکر

بەڕێوبەری نووسین لە پێگە و ماڵپەڕی کەی ئای تی ئێن، خوێندکاری کۆلێژی پزیشکی دەرمانسازی.