وەشانی DaVinci Resolve 21 بە تایبەتمەندی دەستکاریکردنی وێنە و چەندین ئامرازی AI ڕاگەیاندرا

لە میانەی پێشانگای NAB 2026 لە لاس ڤێگاس، کۆمپانیای Blackmagic Design بە فەرمی وەشانی نوێی بەرنامە بەناوبانگەکەی، DaVinci Resolve 21ی ڕاگەیاند. ئەم وەشانە نوێیە تەنها بۆ مۆنتاژی ڤیدیۆ نییە، بەڵکو گەورەترین گۆڕانکاری لە مێژووی بەرنامەکەدا هێناوە ئەویش هێنانە ناوەوەی تایبەتمەندی دەستکاریکردن و ڕێکخستنی ڕەنگی وێنەیە (Still Photos) بە هەمان ئەو ئامرازە پێشکەوتووانەی هۆلیوود بەکاریان دەهێنێت!

ئەمانە گرنگترین نوێکارییەکانی DaVinci Resolve 21ـن:

١. پەڕەی نوێی وێنە (The New Photo Page)

بۆ یەکەمجار، داڤینچی ڕیزۆڵڤ پەڕەیەکی تایبەتی بۆ وێنەگرتنی فۆتۆگرافی زیادکردووە. ئێستا دەتوانیت وێنەکانت هاوردە بکەیتە ناو داڤینچی و بە شێوازی نۆد (Node-based) ڕەنگەکانیان ڕێکبخەیت (Color Grading).

• دەتوانیت هەمان ئەو ئامرازانەی بۆ ڤیدیۆ هەن (وەک Curves و Power Windows) بۆ وێنە بەکاربهێنیت بەبێ ئەوەی کوالێتییە ڕەسەنەکەی لەدەست بدات.
• تایبەتمەندی Camera Controls زیادکراوە کە ڕێگەت پێدەدات ڕاستەوخۆ کامێراکانی سۆنی و کانۆن ببەستیتەوە بە بەرنامەکەوە (Tethering) و ڕاستەوخۆ وێنەکان بگریت و ڕەنگەکانیان ڕێکبخەیت.

٢. لافاوێک لە ئامرازەکانی ژیریی دەستکرد (AI Tools)

داڤینچی ٢١ پڕکراوە لە دەیان ئامرازی نوێی زیرەکی دەستکرد کە کاتێکی یەکجار زۆرت بۆ دەگەڕێننەوە:

CineFocus: بە کلیکێک دەتوانیت فۆکەسی ڤیدیۆکە بگۆڕیت و (Depth of field) یان ئیفێکتی بۆکێی بۆ دروست بکەیت بە شێوەیەک زۆر لە ڕاستیەوە نزیک بێت.

AI Speech Generator: دەتوانیت تێکست بنووسیت و بەرنامەکە بیکات بە دەنگ. تەنانەت تەنها بە پێدانی نموونەیەکی ١٠ چرکەیی لە دەنگی خۆت، دەتوانێت دەنگت لەبەر بکاتەوە و بۆ Voiceover بەکاری بهێنێت!

دەستکاریکردنی ڕووخسار (Face Tools): بەهۆی ئامرازی Face Age Transformer دەتوانیت تەمەنی ئەکتەرەکە گەورە یان بچووک بکەیتەوە (زیادکردن یان لابردنی چرچولۆچی). هەروەها ئامرازی Face Reshaper بۆ گۆڕینی شێوەی لووت، چاو و دەم، لەگەڵ Blemish Removal بۆ لابردنی پەڵە و زیپکەی پێست.

IntelliSearch: گەڕانێکی زیرەکە کە ڤیدیۆکانت بۆ شیدەکاتەوە و دەتوانیت بۆ وشەیەک یان دەموچاوی کەسێکی دیاریکراو بگەڕێیت لەناو هەموو ڤیدیۆکاندا.

AI UltraSharpen & Motion Deblur: بۆ ڕوونکردنەوەی ڤیدیۆ لێڵەکان و لابردنی جوڵەی تێکچوو (Motion blur) بە کوالێتییەکی خەیاڵی.

٣. پێشکەوتنی بەشەکانی Fusion و Fairlight

بۆ بەشی دروستکردنی ئیفێکتەکان (Fusion)، زیاتر لە ٧٠ گرافیکی نوێی Krokodove زیادکراون، هەروەها ئێستا بەتەواوی پشتگیری لە ئەنیمەیشنی Lottie و فایلەکانی .json دەکات.

ئەمە لە کاتێکدا، لە بەشی دەنگدا (Fairlight)، ئێستا دەتوانیت تراکەکانی دەنگ بخەیتە ناو فۆڵدەرەوە (Folder Tracks) بۆ ئەوەی شوێنی کەمتر بگرن و بەڕێوەبردنیان ئاسانتر بێت.

کەی بەردەست دەبێت؟

ئەوەی جێگەی دڵخۆشییە ئەوەیە کە کۆمپانیای Blackmagic Design ڕایگەیاندووە، وەشانی تاقیکاری گشتی (Public Beta) بۆ DaVinci Resolve 21 هەر ئێستا بە خۆڕایی لە ماڵپەڕی فەرمی کۆمپانیاکە بۆ دابەزاندن بەردەستە. کرتە بکە.

ئایا تۆ بەکارهێنەری داڤینچیت یان پریمیێر پرۆ؟ پێت وایە زیادکردنی تایبەتمەندی دەستکاریکردنی وێنە دەبێتە هەڕەشە بۆ سەر بەرنامەکانی ئەدۆبی وەک ڵایترووم و فۆتۆشۆپ؟ لە کۆمێنت ڕای خۆت بنووسە!

سەردار عبدالله

مامۆستای زانکۆ و هەڵگری ماستەر لە فێرکردنی زمانی ئینگلیزی و تەکنەلۆژیا. ساڵانێکە هەواڵ و زانیاری بە زمانی کوردی دەنوسم و ئێستاش لێرە هەم نوسەر و هەمیش بەڕێوەبەری گشتیم بۆ ماوەی زیاتر لە ١٤ ساڵە. هەروەک گرافیک دیزاینەریش خەونی منە! کرتە لە وێنۆچکەی تۆڕە کۆمەڵایەتییەکانم بکەن بۆ ئەوەی زیاتر بمناسن!