بەمزووانە دەتوانیت کۆنتڕۆڵی بەکارهێنانی ڕام لە لایەن وێبگەڕی مایکرۆسۆفت ئێج بکەیت

مایکرۆسۆفت کار لەسەر تایبەتمەندییەک دەکات کە بریتییە لە سنووردار کردنی بەکارهێنانی ڕام لە لایەن وێبگەڕی مایکرۆسۆفت ئێجەوە. Leopeva64 کە یەکێکە لە باشترین دۆزەرەوەکانی تایبەتمەندی لە وێبگەڕی مایکرۆسۆفت ئێجدا، تێبینی بەشێکی نوێی لە ڕێکخستنی وێبگەڕەکەدا لە وەشانی تاقیکاری کردووە. پێدەچێت ڕێکخستنی بەکارهێنانی ڕام بە شێوەیەکی سەرەکی ئامانج لێی یاریکەرانی کۆمپیوتەر بێت، چونکە تایبەتمەندییەکە ڕێگەت پێدەدات سنووردار کردنەکە تەنها لە کاتی یاری کردن یاخوود بۆ هەموو کاتێک بێت.

A new section on the Settings page could let you control how much RAM Edge can use, you can also choose whether this control is activated only when you are playing a game or always:https://t.co/YiCu5igL0U pic.twitter.com/pE29PI6FfR

— Leopeva64 (@Leopeva64) March 27, 2024

دەتوانیت بڕی ڕامی بەکارهێنراو لە نێوان 1 گێگابایت بۆ 16 گێگابایت دیاری بکەیت ئەگەر کۆمپیوتەرێک ڕامەکەی 16 گێگابایت بێت. بەڵام مایکرۆسۆفت ئاگاداری دەدات کە سنووردار کردن بۆ ڕێژەیەکی کەمی ڕام لەوانەیە خێرایی وێبگەڕەکە کەم بکاتەوە. لە ئێستادا ئەم وەشانە تەنها بۆ وەشانی تاقیکاری (Canary) بەردەستە و دیار نییە کەی مایکرۆسۆفت بۆ هەمووان بەردەستی دەکات.

میران ئەبوبەکر

بەڕێوبەری نووسین لە پێگە و ماڵپەڕی کەی ئای تی ئێن، خوێندکاری کۆلێژی پزیشکی دەرمانسازی.